Xəbər verdiyimiz ki, 12 fevral tarixində “KATALİZATOR ArtHub”un “Böyük Britaniyanın çağdaş dramaturgiyası: TANIMA” layihəsi başlayır. Bazar ertəsi baş tutacaq birinci görüş iki hissədən ibarətdir.

Saat 9.00-da ADMİU-nun əsas tədris korpusunun ikinci mərtəbəsində yerləşən Elmi Şura otağında qeydiyyat başlanır. Saat 9.30-da ADMİU-nun və Britaniya Şurasının Azərbaycan nümayəndəliyinin iştirakı ilə açılış mərasimi baş tutacaq. Saat 10.00-da isə iştirakçılar London Nitq və Dram Sənəti Kral Məktəbinin Dramaturgiya kafedrasının müəllimi Sara Qroçalanın “Böyük Britaniyada çağdaş teatr / dramaturgiya” mövzusunda seminarını dinləyə biləcəklər.

Sara Qroçala London dramaturqu və pedaqoqudur. Onun ən məşhur pyesi “S-27” 2007-ci ildə iceandfire/Amnesty Beynəlxalq İnsan Hüquqlarının Qorunması dramaturgiya müsabiqəsinin qalibi olmuş, 2009-cu ildə Finboro Teatrında, 2010-cu ildə Qriffin Teatrında səhnəyə qoyulmuş və bu yaxınlarda #FinboroughforFree onlayn nümayişinin bir hissəsi olmuşdur. O ən son işi olan “Kəşfiyyat” pyesinə görə 2023-cü ilin Ən yaxşı qadın dramaturqu mükafatını qazanmışdır. Bu əsər Milli Teatr Studiyası, Kral Şekspir Teatrı, The Orange Tree şirkətlər şəbəkəsi, “Sphinx”, İngiltərə İncəsənət Şurası, Peggy Ramsay Fondu, “The Orchard Project”, Ki Vest Studiyası və OffWestEnd.com tərəfindən dəstəklənib. Dramaturgiya ilə yanaşı, o, mütəmadi olaraq “Doktor Kim” və “Qisasçılar. Böyük Final” audiotamaşalar silsilələri üçün ssenari yazır.

Hal-hazırda o, Nitq və Dram Sənəti Kral Məktəbində Dramaturgiya kafedrasının müəllimi kimi magistr pilləsində “Səhnə və televiziya dramaturgiyası” fənnini tədris edir. Teatrla bağlı yazılardan ibarət “Müasir siyasi pyes” və “Rupert Quldun teatrı” adlı kitabları var. Londonun Yard Teatrında “Breksit səhnəni tərk edir” adlı Avropa dramaturgiya festivalı və Britaniya səhnələrində müasir Avropa pyeslərinin çatışmazlığı mövzusunda konfrans təşkil etdiyinə görə 2018-ci ildə Britaniya Akademiyasının “Parlayan ulduz” mükafatı laureatı olub.

Saat 11-də isə ADMİU-nun Kiçik səhnəsində tədbirin ikinci hissəsi baş tutacaq. Teatrşünaslıq kafedrasının müəllimi Emin Əliyevin moderatorluğu ilə baş tutacaq tədbir “Böyük Britaniya dramaturgiyasında sosial mövzu dominant konsept kimi” adlanır. Bu hissədə iştirakçılar çağdaş Böyük Britaniya dramaturgiyası haqqında onları maraqlandıran bir sıra suallara cavab tapa biləcək, eləcə də Əməkdar artist, dosent Yaqut Paşazadənin rəhbərliyi ilə Teatr sənəti fakültəsinin tələbələri tərəfindən hazırlanmış “Bürclər” (Nik Peyn) pyesindən fraqmentin teatrallaşdırılmış oxunuşuna tamaşa edəcəklər. Oxunuşdan sonra müzakirə davam edəcək.

“Katalizator ArtHub”-ın təşkilatçılığı, Britaniya Şurasının təşkilati, Teatro.az sənət portalının informasiya dəstəyi, Azərbaycan Dövlət Mədəniyyət və İncəsənət Universiteti, YUĞ Dövlət Teatrının, CHARACTERS Müasir Dramaturgiya  Festivalının və Ritual Mobil teatr laboratoriyasının tərəfdaşlığı ilə keçirilən layihənin əsas məqsədi Azərbaycan tamaşaçısında müasir Böyük Britaniya dramaturgiyası haqqında təsəvvür yaratmaqdan ibarətdir. Qeyd edək ki, layihə çərçivəsində növbəti tədbirlər 16 və 23 fevral tarixlərinə nəzərdə tutulub. Layihənin gedişatı haqqında ətraflı məlumat əldə etmək üçün, rəsmi instaqram səhifəsini (@katalizatorarthub) və Teatro.az sənət portalını izləyə bilərsiniz.

12 fevral tarixində baş tutacaq tədbirlərdə iştirak üçün qeydiyyat linki:

QEYDİYYAT LİNKİNƏ KEÇİD ETMƏK ÜÇÜN (tıklayın)
 

 “KATALİZATOR ArtHub” “Böyük Britaniyanın çağdaş dramaturgiyası: TANIMA”, 12 fevral 2024, Bazar ertəsi

09:00   Qeydiyyat      
09:30   Açılış mərasimi
10:00   Seminar: “Böyük Britaniyada çağdaş teatr / dramaturgiya”
             Spiker: Sara Qroçala, dramaturq, London Nitq və Dram Sənəti Kral Məktəbinin Dramaturgiya kafedrasının müəllimi
             Məkan: Elmi Şura otağı
 
11:00   Müzakirə: “Böyük Britaniya dramaturgiyasında sosial mövzu dominant konsept kimi”
             Pyes oxunuşu
             Nik Peyn “Bürclər” (qısa fraqment)
             Moderator: Emin Əliyev
             Məkan: Kiçik səhnə

            Ünvan:  Azərbaycan Dövlət Mədəniyyət və İncəsənət Universiteti; Bakı şəhəri, İnşaatçılar prospekti 39.
 

KATALIZATOR ArtHub Contemporary playwriting of UK: AWARENESS, THE FIRST MEETING, 12 February 2024, Monday.

09:00    Registration    
09:30    Opening Сeremony
10:00    Seminar: “Contemporary theatre / dramaturgy in the UK”
              Speaker: Sarah Grochala, playwright, course leader of the MA MFA Writing for Stage and Broadcast Media Programme at London Royal Central School of Speech and Drama
              Venue: Academic Council Room
 
11:00   Discussion: The social theme as a dominant concept in British drama
             Play Reading
             Author: Nick Payne
             Title: “Constellations” (short extract)
             Moderator: Emin Aliyev
             Venue: Small Stage

             Adress: Azerbaijan State University of Culture and Arts; Ishaatcilar ave. 39, Baku