Azərbaycanın Xalq rəssamı, Respublika Dövlət mükafatı laureatı Nazim Bəykişiyev sentyabrın 8-də, gecə saatlarında uzun sürən xəstəlikdən sonra vəfat edib.

Nazim Zöhrab oğlu Bəykişiyev 29 iyun 1948-ci ildə Bakıda anadan olub. 1969-cu ildə Ə.Əzimzadə ad. Rəssamlıq Məktəbinin rəngkarlıq fakültəsini, 1975-ci ildə Moskvada Dövlət Teatr Sənəti İnstitunun teatr rəssamı fakültəsini bitirib. Ali təhsil aldıqdan sonra üç il Rusiyada Orconikidze şəhərinin Kukla Teatrında və Rus Dram Teatrında quruluşçu rəssam işləyib. Bu teatrlarda on beşdən çox əsərə səhnə tərtibatı verib. 1978-1980-ci illərdə Sumqayıt Dövlət Dram Teatrında rəssam, 1980-1987-ci illərdə Azərbayacan Dövlət Akademik Musiqili Teatrda quruluşçu rəssam, 1987-1991-ci illərdə baş rəssam, 1991-2001-ci illərdə Dövlət Gənclər Teatrında baş rəssam işləyib. 2001-ci ildən Akademik Milli Dram Teatrında baş rəssam vəzifəsində çalışırdı. Həmin ildən eyni zamanda Azərbaycan Dövlət Rəssamlıq Akademiyasında pedaqoji fəaliyyət göstərirdi.

Müxtəlif teatrlarda onlarla tamaşaya, o cümlədən “Hamlet” (U.Şekspir), “Lənkəran xanının vəziri” (M.F.Axundzadə), “Ölülər” (C.Məmmədquluzadə), “Karmen” (P.Merime) “Dirilən adam” (M.Cəlal), “Kaş araba aşmayaydı!..” (O.İoseliani) əsərlərinə səhnə tərtibatı verib. Akademik Milli Dram Teatrında “İblis” (H.Cavid) tamaşasına verdiyi səhnə tərtibatına görə (E.Məmmədovla birgə) 1984-cü ildə Respublika Dövlət mükafatı alıb. 2006-cı ildə Vyana Kamera Operasında tamaşaya qoyulmuş Ü.Hacıbəylinin “Arşın mal alan” musiqili komediyasının quruluşçu rəssamı olub. 1988-ci ildə Londonda fərdi sərgisi keçirilib.

Azərbaycan Teatr Xadimləri İttifaqının “Qızıl Dərviş” (2004) mükafatına, “Sənətkar” medalına (2018) layiq görülüb.

Allah rəhmət eləsin.