Dekabrın 19-da İsveçrənin “Le temps” qəzetinin saytında 21-ci əsrin ən görkəmli teatr xadimlərinin siyahısı yayımlanıb. 

Əsrimizin 20 ən yaxşı tamaşasını seçmək ideyası pandemiya dövründə meydana gəlib. “Le temps” qəzetinin münsiflər heyətinə fransızdilli ölkələrdən və Fransadan 46 jurnalist, tənqidçi, dramaturq, teatr rejissoru və universitet professorları daxil edilib. 

Münsiflər heyətinin hər bir üzvü teatr dünyasının 20 “incisi”nin adını yazmaqla öz siyahısını tərtib edib ki, ümumillikdə 900-ə yaxın addan ibarət siyahı yaranıb. Qaydalar isə sadə olub: tamaşalar 2000-2020-ci illər aralığında fransızdilli ölkələrdə qurulan əsərlərdən (əgər xarici dildə qoyulubsa subtitirli olan tamaşalar) seçilir. Bundan əlavə, münsiflər eyni müəllifin bir neçə işini də seçə bilərdi. 

Tamaşaların siyahısına: Dantenin “İlahi komediya”sı əsasında Romeo Kastelluççinin hazırladığı “İnferno” tamaşası, Çexovun “Üç bacı” pyesi əsasında Kristiana Jatahın hazırladığı “Əgər onlar Moskvaya getsə idilər nə olardı?” tamaşası, Kşiştof Varlikovskinin “(A) pollonia”, Yana Deyvendakın “Buyurun, davam edin (Hamlet)”, Tomas Ostermayerin “III Riçard” tamaşası və digər səhnə əsərləri daxil edilib. 

"Le temps”ın yazdığına görə, “Biz böyük tamaşaların dünyanı dəyişməsə də, ondan zövq almağa imkan verdiyini və bu mənada, həyata baxışımızı yenilədiyini göstərmək istəyirdik.”

Münsiflər heyəti həmçinin, əsrimizin ən məşhur teatr xadimlərinin adlarını da qeyd ediblər.

1. Romeo Kastelluççi (33 səs)

2. Milo Rau və Vajdi Muavad (28 səs)

3. Tomas Ostermayer (26 səs)

4. Joel Pomra (21 səs)

5. Kristof Martaler (20 səs)

6. Stefan Keqi (18 səs)

7. Kşiştof Varlikovskiy və Omar Porras (16 səs)

8. Kristiana Jatahi, Anhelika Liddel və Klod Reji (15 səs)

9. İvo van Hove (14 səs)

10. Yan Deyvendak və Patris Şero (13 səs)

11. Saymon Makberni, Rodriqo Qarsia, Pippo Delbono, Kristian Lyupa və “TG STAN” kollektivi (11 səs)

12. Vensan Maken (10 səs)