Cəfər Cabbarlı adına Azərbaycan Dövlət Teatr Muzeyində 20 oktyabr 2023- cü il saat 14:00 - da Xalq artisti, Lənkəran Dövlət Dram Teatrının aparıcı aktyorlarından biri olan  Qabil Quliyevin yaradıcılıq fəaliyyətinin 50 illik yubileyinə həsr olunmuş “Yarım əsrlik sənət yolum” adlı tədbir keçirildi.

Tədbiri muzeyin direktoru, Əməkdar mədəniyyət işçisi Sevinc Mikayılova giriş sözü ilə açaraq qonaqları salamladı və sənətkarı  yaradıcılığının 50 illik yubileyi münasibətilə təbrik etdi. Ardınca təbriklərə Xalq artistləri Hacı İsmayılov, Nurəddin Mehdixanlı, Əli Nur, Əməkdar incəsənət xadimi, teatrşünas, professor Aydın Talıbzadə, aktyorun tələbə yoldaşı, Muzey Sərvətləri və Xatirə Əşyalarının Elmi Bərpa Mərkəzinin direktoru Zərifə Məlikova, Lənkəran Dövlət Dram Teatrının direktoru İntiqam Hacılı, teatrın baş rejissoru Anar Babalı və ailə üzvləri təbriklərə qoşularaq ürək sözlərini paylaşdılar.

Tədbir çərçivəsində Teatr Muzeyinin fondunda qorunan, aktyorun həyat və yaradıcılığını əks etdirən eksponatlardan hazırlanmış videoçarx, həmçinin oynadığı tamaşa və filmlərdən kadrlar nümayiş olundu.

Eyni zamanda aktoru təbrik üçün  Opera və Balet Tetrının solisti, xanəndə Mütəllim Dəmirov və  Azərbaycan Milli Konservatoriyası nəzdində Asəf  Zeynallı adına Musiqi Kollecinin və İncəsənət Gimnaziyasının tələbələri sənətkarın şərəfinə konsert proqramı ilə çıxış etdilər.

Auiditoriya  incəsənət xadimləri,  aktyorun ailə və sənət dostları, muzey əməkdaşları və media nümayəndələrindən ibarət idi. Sonda xatirə şəkilləri çəkildi.