TEATRO

TEATRO

sənət portalı

post-title

Tanınmış xoreoqraf Eldar Əliyev Bakıya dəvət edilib

Azərbaycan Dövlət Akademik Opera və Balet Teatrının rəhbərliyi tanınmış xoreoqraf, Rusiya Federasiyasının Əməkdar incəsənət xadimi, Mariinski Teatrı Primorsk səhnəsinin baş baletmeysteri Eldar Əliyevi Bakıya dəvət etmişdir.  O, iyunun 8-dən 17-nə kimi olan müddətdə gələcəkdə teatrımızın populyar klassik balet tamaşalarının quruluşunu həyata keçirmək məqsədilə Teatrın balet truppası və truppanın solistləri ilə tanış olacaq, eyni zamanda ustad dərsləri keçirəcəkdir. 

Həmyerlimiz Eldar Əliyev Bakıda doğulmuş, Bakı Xoreoqrafiya Məktəbini, daha sonra Rusiya Balet  Akademiyasını bitirmişdir.  1979-1992-ci illərdə Kirov adına (indiki Mariinski) Teatrın balet truppasının solisti olmuşdur. "Don Kixot", "Məhəbbət əfsanəsi", "Korsar", "Qu gölü", "Bayaderka","Spartak" və bir çox başqa klassik balet tamaşalarında əsas partiyaları böyük uğurla ifa etmiş, dünyanın 40-dan çox ölkəsində qastrol səfərlərində olmuş və ən mötəbər səhnələrdə - Vaşinqtonda Kennedi mərkəzində, Nyu Yorkda Metropoliten-operada, Paris, Berlin, Sidney və Roma operalarında, Milandakı La-Skala Teatrında, Londonun Kovent-Qarden və Kolizeum teatrlarında və s. çıxış etmişdir. O, həmçinin, dəvətli solist kimi Rusiya Akademik Böyük Teatrında  və Avstraliya baletində  çıxış etmişdir. 

1992-ci ildən ABŞ-da çalışır. Əvvəlcə "Ballet İnternationale" balet truppasının aparıı solisti olmuş, az sonra truppanın bədii rəhbəri təyin edilmişdir. 1992-2005-ci illərdə E.Əliyevin rəhbərliyi altında "Ballet İnternationale" 30-dan çox tamaşanı (F.Əmirov "Min bir gecə", P.Çaykovski "Şelkunçik" və "Yatmış gözəl", A.Adan "Jizel", L.Minkus "Don Kixot", İ.Stravinski "Korsar", "Simurq quşu" və s.) səhnəyə qoymuşdur. 

2015-ci ildən E.Əliyev Primorsk Opera və Balet Teatrının baş baletmeysteri, 2016-cı ildən Mariinski Teatrı Primosrk səhnəsinin  baş baletmeysteridir.
 
2021-ci ildə Rusiya Prezidenti V.Putinin sərəncamı ilə E.Əliyev "Rusiya Federasiyasının Əməkdar incəsənət xadimi" fəxri adına  layiq görülmüşdür. 


 

Load Time (S) : 0.000103