Tanınmış teatrşünas, yazıçı-jurnalist Yaqub Əlioğlu uzun sürən xəstəlikdən sonra 68 yaşında vəfat edib.

Yaqub Əlioğlu (Məmmədov) 1956-cı il avqustun 26-da Cəbrayıl rayonunun Soltanlı kəndində anadan olub. 1986-cı ildə M.Əliyev adına Azərbaycan Dövlət İncəsənət İntstitutunun teatrşünaslıq fakültəsini fərqlənmə diplomu ilə bitirib.  

1987-1999-cu illərdə ATXİ-da məsləhətçi, yaradıcılıq şöbəsinin müdiri işləyib. 1999-cu ildən “Azərbaycantelefilm” Yaradıcılıq Birliyində redaktor, baş redaktorun müavini, baş redaktor, böyük redaktor vəzifələrində çalışıb. 100-dən çox sənədli televiziya filminin redaktoru və ya ssenari müəllifi olub. Onun rəhbərliyi ilə ərsəyə gələn 50-dən artıq film televiziyanın “Qızıl fond”una daxil edilib.

Yüzlərlə məqaləsi, “Səhnə rampasının sehri”, “Özlərini səhnədə görənlər”, “Rejissorlarla üz-üzə”, “Sənətdə izi olanlar”, “Şuşa teatrı”, “Sənət çevrəsinin sakinləri”, “Güllələnmə” (hekayələr toplusu), “Qu quşunun nəğməsi”, “Şamonun rənglər dünyası” kitabları çap olunub. 10-a yaxın pyesi dilimizə tərcümə edib.

Yaradıcılıq uğurlarına görə “Qızıl Qələm”, “Qızıl Dərviş” və “Nailiyyət” mükafatlarına layiq görülüb.

Azərbaycan Teatr Xadimləri və Kinematoqrafçılar İttifaqlarının, Jurnalistlər Birliyinin üzvü idi.

Allah rəhmət eləsin.