Cəfər Cabbarlının “Solğun çiçəklər” dramı əsasında hazırlanmış “Solğun sevgilər” adlı tamaşa yeni tərtibat ilə oynanılıb.

Abdulla Şaiq adına Azərbaycan Dövlət Kukla Teatrının mətbuat xidmətindən aldığımız məlumata görə, Cəfər Cabbarlının 120 illik yubileyinə həsr edilən “Solğun sevgilər” tamaşası fevral ayının 28-ində DOST İnklüziv İnkişaf və Yaradıcılıq Mərkəzində baş tutub.

Əmək və Əhalinin Sosial Müdafiəsi Nazirliyi, DOST İnklüziv İnkişaf və Yaradıcılıq Mərkəzi, Abdulla Şaiq adına Azərbaycan Dövlət Kukla Teatrı və “OYUN” müstəqil-inklüziv teatrının birgə layihəsi olan “Solğun sevgilər” tamaşasının səhnələşdirəni və quruluşçu rejissoru Səidə Haqverdiyeva, quruluşçu rəssamı İqbal Əliyev, musiqi tərtibatçısı Vüqar Camalzadə, xoreoqrafı Elnur İsmayılovdur.

Sağlamlıq imkanları məhdud yuxarı yaş qrupundan olan həvəskar aktyorların cəlb olunduğu inklüziv teatrın tamaşasında peşəkar aktyorlar da yer alıb. Tamaşada rolları Məleykə Cəfərova, Türkay Cəfərli, Ülviyyə Əliyeva, Zümrüd Qasımova, Səbinə Məmmədova, Xəqani Əliyev, Qəndaf Əkbərli, Rəsul Zəkiyev, Kamilə Xəlilova, Babək İsmayılov, Rəsul Məmmədli, Rüxsarə Zeynalova və Ceyhun Mahmudov ifa edib.

Tamaşanın əsas ideyası sədaqət, dürüstlük, dostluq və saf məhəbbətin əbədiyaşarlığıdır.