"1 SƏHNƏ" prodüser mərkəzinin nəzdində yaradılmış "Səhnə TV" YouTube kanalı artıq bir ildir fəaliyyətdədir. O öz fəaliyyətində müxtəlif mədəniyyət verilişlərinə üstünlük verir. Televiziyanın rəhbəri Mirzəağa Mirzəyevin məlumatına görə, yaxın vaxtlarda Səhnə TV kanalında teatr tamaşaçılarını sevindirəcək "TEATR EMALATXANASI" adlı yeni veriliş təqdim ediləcək.  

Verilişin layihə rəhbəri "1 SƏHNƏ" prodüser mərkəzinin direktoru, aktyor Elçin Hacı, ideya müəllifi və aparıcısı isə Akademik Rus Dram Teatrının aktyoru, Boris Şukin adına Moskva Teatr İnstitutunun məzunu Abdulla Elşadlıdır. Layihənin məqsədi dünya və Azərbaycan mədəniyyətini və incəsənətini təbliğ etməkdir. Hər verilişin birinci hissəsinin dünya teatrlarına yenilik gətirmiş teatr novatorlarına, onların teatr sistemi, məktəb və yanaşmalarına həsr edilməsi nəzərdə tutulur. Verilişin "Emalatxana qonağı" rubrikasında isə bir aktyor və ya bir rejissor qonaq çağrılır və onların iştirakı ilə barəsində söhbət açılan novotorun nəzəri fikirlərinin praktiki tərəfi tamaşaçılara göstərilir. 

Artıq verilişin "STANİSLAVSKİ SİSTEMİ. TEATR-ƏMƏLDİR" adlı birinci bölümü tamaşaçılara təqdim edilib. Verilişin ilk qonağı Gənc Tamaşaçılar Teatrının və Səhnə teatrının aktyoru Ramil Məmmədovdur.