2022-ci il iyul ayının 16-17-də teatr mövsümünün bağlanışı ilə əlaqədar Qax Dövlət Kukla Teatrında "Çirkin ördək balası" (H.X.Anderson) tamaşasına ictimai baxış, "Tülkünün uçuşu" (R.Əlizadə) və "Xeyir və Şər" (N. Gəncəvi) tamaşalarının nümayişi oldu. Rayon rəhbərliyi, yerli ziyalılar, balaca tamaşaçılar və Bakıdan dəvət olunmuş teatrşünas və sənət yazarlarının iştirakı ilə oynanılan tamaşalar böyük maraq və rəğbətlə qarşılandı. Mövsüm ərzində fərqlənən iki əməkdaş - Araz Mehrablı və Nicat Abuzərli toplaşanların gözü önündə mükafatlandırıldılar.

Birinci tamaşadan və hər üç səhnə əsərinin nümayişindən sonra ictimai müzakirələr keçirildi. Tamaşalar təhlil olundu, diqqət çəkən fikirlər söylənildi.

Teatrın kollektivi mütəxəssislərin, eyni zamanda ictimaiyyət nümayəndələrinin- Qax RİH başçısının müavini Vəfa Heydərova, AMEA-nın əməkdaşı, teatrşünas alim Vidadi Qafarov, "Mədəniyyət" jurnalının baş redaktoru, filologiya üzrə fəlsəfə doktoru, əməkdar mədəniyyət işçisi Zöhrə Əliyeva, sənət yazarı Etibar Cəbrayıloğlu, "Xalq" qəzetinin bölgə müxbiri İlqar Həsənov, Gəncə Dövlət Kukla teatrının direktoru Fərmail Paşayev, "Yeni Azərbaycan Partiyası" Qax rayon təşkilatının sədri Natiq Allahverdiyev, Şəki regional təhsil idarəsinin rəis müavini Günay Mahmudova, Qax bələdiyyəsinin sədri

Eyvaz Orucov, teatrın direktoru Seymur Vəliyev, baş rejissor Yusif Abdurahmanov, quruluşçu rejissorlar Araz Mehrablı, Rahib Məmmədov və başqalarının rəylərini maraqla dinlədilər.

Çıxışçılar teatrın yeni təyin edilmiş direktoru Seymur Vəliyev və bütövlükdə kollektivə gələcəkdə daim dəstək olacaqlarına söz verdilər. Sənətçilər səsləndirilən müəyyən irad və təklifləri gələcəkdə nəzərə alacaqlarını bildirdilər. Yeni teatr mövsümünün əvvəlində sənət öcağının 50 illik yubileyinə hazırlıq məsələsindən də söhbət açıldı.

Qonaqlar və tamaşaçılar teatr mövsümünün bağlanışından xoş təəssüratla ayrıldılar.