Azərbaycan Dövlət Mədəniyyət və İncəsənət Universitetində KATALİZATOR ArtHub və Tələbə Elmi Yaradıcılıq Cəmiyyətinin dəstəyi ilə həyata keçirilən “Docendo discimus” layihəsi çərçivəsində “Parateatral formalar və teatr” mövzusunda təlim baş tutacaq. 11 iyun 2024-cü il tarixində saat 14:00-da ADMİU-nun Kiçik səhnəsində baş tutacaq təlim universitetin Teatrşünaslıq ixtisası üzrə sonuncu təhsil ilinin tələbəsi Fatimə Qurbanzadə tərəfindən keçiriləcək.

Reformator Yeji Qrotovski tamaşaçının yeni bir “teatral dil” axtarışında olduğunu düşünürdü. Həmin dil aktiv mədəniyyətə aid olan parateatr demək idi. O, hamının yaradıcı fərd ola biləcəyinə inanırdı. Bu o mənaya gəlir ki, artıq tamaşaçı yerinə hamı iştirakçı (aktyor) olacaq. 1975-ci ildə Qrotovski həmkarı teatr tənqidçisi Lüdvik Flazsen ilə birlikdə “Millətlər teatrı” layihəsini həyata keçirdi. E.Barba, P.Bruk, L.Ronkoni və A.Qreqorini dəvət etdilər. Əlbəttə, “über-rejissor” Qrotovski idi. Artıq 1970-1980-ci illərdən etibarən parateatral formalar ortaya çıxmağa başladı. Bu təlimdə üç parateatral nümunənin üzərində dayanılacaq: stand up, installyasiya sənəti və performans.

Müasir sənətin böhranı və ya daha dəqiq şəkildə ifadə etsək, təkamülü bütün aspektlərdə cəmiyyətin tələblərinə tabe olaraq dəyişir. Təlimin əsas məqsədlərindən biri auditoriyanı vahid elmi problem ətrafında düşünməyə və münasibət bildirməyə cəlb etməkdir.

Qeyd:

ADMİU-nun Kiçik səhnəsində baş tutacaq tədbirdə iştirak üçün aşağıdakı linkə keçid edərək qeydiyyatdan keçmək tələb olunur.  

QEYDİYYAT FORMASI (yükləmək üçün tıklayın)