Nəhayət, uzun müddətdən sonra Azərbaycan Dövlət Akademik Opera və Balet Teatrı öz ənənəvi tamaşa formatını bərpa etməyə hazırlaşır. Teatrın mətbuat katibindən aldığımız məlumata görə, “Üzeyir Hacıbəyli XIII Beynəlxalq Musiqi Festivalı” çərçivəsində oynanılacaq iki opera tamaşasının adı artıq bəllidir. Onlardan biri Ü.Hacıbəylinin “Leyli və Məcnun”, digəri isə Cüzeppe Verdinin “Traviata” operasıdır.

Sentyabrın 21-i oynanılacaq “Leyli və Məcnun” tamaşasının əsas partiyalarını Respublika muğam müsabiqəsinin laureatı Rəvanə Əmiraslanlı (Leyli) və Əməkdar artist Elnur Zeynalov (Məcnun) ifa edəcəklər. Operada həmçinin Respublikanın Əməkdar artistləri Təyyar Bayramov (Məcnunun atası), Cahangir Qurbanov (Nofəl) və b. çıxış edir. Tamaşanı Əməkdar incəsənət xadimi, Prezident mükafatçısı Sevil Hacıyeva idarə edəcək.

Sentyabrın 24-ü isə “Traviata” operası oynanılacaq. Tamaşada baş rolu - Violetta partiyasını ifa etmək üçün tanınmış polşalı müğənni, vokalçıların beynəlxalq müsabiqələrinin laureatı İvona Sobotka dəvət edilib. Onun tərəf müqabili kimi Alfred partiyasını Azərbaycan Respublikasının Xalq artisti Samir Cəfərov ifa edəcək.

Tamaşada həmçinin Xalq artistləri Əli Əsgərov (Markiz), Əkrəm Poladov (Doktor), Əməkdar artistlər Cahangir Qurbanov (Jermon), Səbinə Vahabzadə (Flora), Tural Ağasıyev (Qaston), gənc solistlər Nina Makarova (Anina) və Mahir Tağızadə (Baron) çıxış edəcəklər.

Opera tamaşasını Əməkdar artist, dirijorların beynəlxalq müsabiqələrinin  laureatı Əyyub Quliyev idarə edəcək. 

Tamaşaçılar Nazirlər Kabineti yanında Operativ Qərargahın  koronovirusla mübarizə qaydalarına uyğun olaraq zala buraxılacaq və əyləşdiriləcəklər.