CHARACTERS Teatrı və Fluxus Space incəsənət qalereyası İsmayıl İmanın eyniadlı pyesi əsasında səhnələşdirilmiş “Omid, sonuncu ağ durna” tamaşasını təqdim edirlər.
Tamaşa ağ durnaların qərb populyasiyasının son nümayəndəsi olan Omidin real hekayəsinə əsaslanır. Azərbaycanın Qırmızı Kitabına daxil edilmiş Omid 15 ildən artıq müddətdə Sibirdən Xəzər dənizinin cənub sahillərinə təkbaşına uçmuşdur. Son iki ildə isə o, nə qışlama yerində, nə də köç marşrutunun keçid məntəqələrində müşahidə olunmur. Omidin həlak olması ehtimalı yüksəkdir və onunla birlikdə bütöv populyasiyanın yolu da qırılmış ola bilər.
“Omid, sonuncu ağ durna” – sonuncu durna və yoxa çıxmaqda olan marşrut haqqında poetik dildə danışılan hekayədir. Canlı musiqidən istifadə edərək tamaşanın rejissoru Mikayıl Merdinli elə bir məkan yaradır ki, burada quş mifoloji varlığa çevrilir, onun yolu isə yox olmamalı və yox ola bilməyən bir izə dönür. Çünki Omid yalnız bir quş deyil. Omid – Ümiddir.
“Omid, sonuncu ağ durna” tamaşası müstəqil CHARACTERS Teatrının ilk layihəsi olub və Fluxus Space incəsənət qalereyası ilə birgə həyata keçirilmişdir. Tamaşa məhz qalereyanın məkanında nümayiş olunacaq.
İsmayıl İman, dramaturq, CHARACTERS bədii rəhbəri:
“CHARACTERS 2023-cü ildə müasir dramaturgiya festivalı və pyes müsabiqəsi kimi nəzərdə tutulmuşdu. Zamanla layihə genişləndi və transformasiya olundu: təhsil proqramları, xarici pyeslərin oxunuşları, pyes tərcümələri müsabiqəsi və ikinci dramaturgiya müsabiqəsi yarandı. Eyni zamanda British Council, İsveçrə İnkişaf və Əməkdaşlıq Agentliyi, Çilinin Azərbaycandakı Səfirliyi, EURODRAM – Avropanın dram əsərlərinin tərcümə şəbəkəsi, Azərbaycan Dövlət Mədəniyyət və İncəsənət Universiteti və Azərbaycan teatrları ilə beynəlxalq və yerli əməkdaşlıqlar inkişaf edirdi.
Son bir il ərzində CHARACTERS ardıcıl şəkildə öz tamaşalarını səhnələşdirməyə doğru irəliləmişdir. Bu gün isə deyə bilərik: CHARACTERS festivalı, pyes müsabiqəsini və teatrı birləşdirən Müasir Dramaturgiya Hərəkatıdır. Hələlik öz səhnəsi olmasa da”.
İsmayıl İmanın “Omid, sonuncu ağ durna” pyesi Beynəlxalq Teatr Akustik Məktəbi üçün (Beynəlxalq Teatr İttifaqları Konfederasiyasının layihəsi; bədii rəhbər – rejissor və Moskva Bədaye Akademik Teatrının (MXAT) Məktəb-Studiyasının pedaqoqu Viktor Rıjakov) yazılmış və 2025-ci ilin oktyabr ayında Astanada (Qazaxıstan) kollektiv tamaşanın tərkibində təqdim edilmişdir.
Yeni tamaşanın premyera nümayişləri 10 və 17 mart 2026-cı il tarixlərində baş tutacaq. Biletlər iTicket.AZ saytında mövcuddur: https://iticket.az/events/theatre/omid-the-last-white-crane-characters-theatre/
Pyesin müəllifi: İsmayıl İman
Quruluşçu rejissor: Mikayıl Merdinli
Quruluşçu rəssam: Rufana Mamedova
Plastik həll: Nigar Güləhmədova
Rollarda: Məmməd Rəfiyev, Kamal İbrahimov, Atika Əliyeva, Avsəddin Ələkbərov, Rami Klim.
Ünvan - Fluxus Space (28 may küçəsi, 5)
Tarix - 10.03.2026 / 17.03.2026
Saat - 19:30–20:30