Qazaxıstanın mədəniyyət paytaxtlarından biri sayılan Taldıkorqan şəhəri 12–17 sentyabr 2025-ci il tarixlərində böyük bir mədəniyyət hadisəsinə - 3-cü “BİKENFEST” Beynəlxalq Teatr Festivalına ev sahibliyi edib. Qazaxıstanın Xalq artisti Biken Rimovanın xatirəsinə həsr olunan festival Orta Asiya və Qafqazın teatr kollektivlərini bir araya gətirərək regionun ən mühüm teatr tədbirlərindən birinə çevrilib. Festival çərçivəsində Qazaxıstan, Özbəkistan, Gürcüstan və Qırğızıstanın nüfuzlu Dövlət Akademik Dram teatrları ilə yanaşı, Azərbaycanı da müstəqil “M.Teatr” təmsil edib. Xalq Artisti Vidadi Həsənovun rəhbərliyi ilə çıxış edən teatr kollektivinin səhnəyə gətirdiyi Stefan Sveyqin məşhur “Yad qadının məktubu” əsəri festival iştirakçıları və tamaşaçılar tərəfindən böyük maraq və alqışlarla qarşılanıb. Seyrçılər Vidadi Həsənovun quruluş verdiyi, Röya Hüseynovanın bəstəçisi olduğu tamaşaya, Oksana Rəsulova, Ziya Ağa və Vidadi Həsənovun ifasında baxıbar. Festivalı sənətçilərimiz üçün yaddaqalan edən ən əlamətdar məqam isə Azərbaycanın tanınmış teatr və kino aktrisası Oksana Rəsulovanın qazandığı uğur olub. Sənətçi festivalda “Ən yaxşı qadın rolu” nominasiyasına layiq görülüb. Onun ifasının emosional dərinliyi, qəhrəmanın daxili aləmini tamaşaçılara incəliklə çatdırmaq bacarığı həm münsiflər heyətinin, həm də tamaşaçıların rəğbətini qazanıb. Mükafatlandırma mərasimində qalib sənətçilərə diplom və pul mükafatları təqdim olunub. Oksana Rəsulova festivaldan 500 min tenge (təxminən 1570 manat) pul mükafatı ilə geri dönüb. Bu uğur həm “M.Teatr”ın yaradıcılıq potensialını, həm də Azərbaycan teatr sənətinin beynəlxalq səviyyədə yüksək dəyərləndirildiyini bir daha göstərir.