Azərbaycanlı rejissor Mikayıl Mikayılov Qazaxıstanda tamaşa hazırlayıb. K.S.Stanislavski adına Karaqanda Rus Dram Teatrında fransız yazıçısı Rober Tomanın “Səkkiz qadın” pyesi əsasında hazırlanmış eyniadlı tamaşanın premyerası 16, 17 aprel tarixlərində baş tutub.Tamaşa Qazaxıstanın teatr ictimaiyyəti tərəfindən maraqla qarşılanıb.

Tamaşada hadisələr şəhərkanarı villada baş verir. Bir-birinə doğma və yaxın olan səkkiz qadın burada yeni ili qeyd etməyə hazırlaşırlar. Lakin bayramqabağı ev sahibini öz kabinetində kürəyinə bıçaq sancılmış vəziyyətdə tapan qadınların bütün planları alt-üst olur. Ev sahibinin qətlində hər kəs: mərhumun arvadı, qızı, ögey qızı, qayınanası, baldızı, bacısı, şəxsi xidmətçisi və evin qulluqçusu şübhə altındadır. Səkkiz qadın müəmmalı cinayətkarı üzə çıxarmaq məqsədilə özləri ciddi araşdırmaya başlayırlar. Onların arasında amansız “həqiqət oyunu” başlayır. Bu oyunda qadınların zəiflikləri, yalanları, gizli inciklikləri üzə çıxır. 

Tamaşanın quruluşçu rəssamı Mustafa Mustafayev, xoreoqrafı İrina Nikolayeva, işıq rəssamı Denis Svetkov, musiqi tərtibtçıs Yerlan Saduakasovdur. Rolları Valentina Şmatenko, Marina Marıçeva, Qalina Turçina, Oksana İqnatenko, Svetlana Patyomkina, İrina Nikolayeva, Aleksandra Martins və Alyona Zvonova ifa edirlər. Tamaşanın xronometrajı 3 saat 10 dəqiqədir. 

Tamaşanın növbəti premyerası aprelin 27-də olacaq.