Kanadalı aktyor Christopher Plummer 91 yaşında vəfat edib. Plummer ABŞ-ın Konnektikut əyalətindəki evində dünyasını dəyişib. Vəfat edərkən həyat yoldaşı Elaine Taylor yanında olub.

46 illik meneceri və dostu Lou Pitt Plummeri "işinə hörməti və dərin bağlılığı ilə seçilən fövqaladə insan” adlandırıb. Plummerin Kanada üçün milli bir sərvət olduğunu söyləyən Pitt – “O, sənəti və insanlığı ilə qəlbimizə toxunmağı bacarırdı. Onun əfsanəvi həyatı illər boyu davam edəcək. O, sonsuza qədər bizimlə olacaq” – deyib.

Plummer 82 yaşında Oskar alan ən yaşlı insan kimi tarixə düşüb.

BBC Türkün verdiyi xəbərə görə, Plummer, 2012-ci ildə “Beginners” filmindəki roluna görə “Ən yaxşı yardımçı aktyor” nominasiyası üzrə Oskar mükafatına layiq görülmüş, 2010-cu ildə “The Last Station” və 2018-ci ildə “All the Money in the World” filmləri Oskara namizəd olmuşdu.

Kino Sənətləri və Elmləri Akademiyası başsağlığı mesajında Plummeri "izləyiciləri  heyran edən aktyor" adlandırıb və onun hər zaman ehtiramla xatırlanacağını bildirib.

BAFTA isə yayımladığı mesajda 1950-ci illərdən bəri Plummerin uğurlarından, gördüyü işlərdən danışıb.

2016-cı ildə "The Exception" filmində birlikdə rol aldığı aktyor Eddie Marsan Plummerin ölümündən sonra verdiyi açıqlamada "Artıq sübut edəcək bir şeyi yox idi. Bu səbəbdən də tamamilə sərbəst, nəzakətli, komik, dəcəl Plummeri izləmək gözəl idi.  Qəbri nurla dolsun...”

CRİSTOPHER PLUMMER HAQQINDA

Brodveydə və Royal Shakespeare Company-də oynadığı rollar və televiziya və kino sahəsində iştirak etdiyi yüzlərlə layihə sayəsində möhtəşəm bir karyera quran Plummer Julie Andrews ilə birlikdə oynadığı “The Sound of Music” müzikli ilə məşhurlaşmışdı.

1929-cu ildə Torontoda anadan olan Plummer, uşaqlıqdan incəsənətlə maraqlanırdı. Babası Sir John Abbott  Kanadanın keçmiş baş naziri olduğu üçün Plummerin uşaqlığı da Monrealda keçmişdi.

Aktyorluq karyerasından əvvəl fortepiano ixtisası üzrə təhsil alan Plummer fortepianoda peşəkar ifa etməyi "çox tənha və çox çətin bir iş" kimi qəbul edirdi.

Plummer ilk dəfə 1954-cü ildə Nyu-Yorkda aktrisa Mary Astor ilə birlikdə səhnəyə çıxmışdı. 1958-ci ildə “Stage Struck” filmində debüt etmişdir. 1974-cü ildə  isə Sirano de Berjerak roluna görə Tony mükafatına layiq görülmüşdür.

Aktrisa Tammy Grimes də daxil olmaqla ümumilikdə üç dəfə evlənən Plummer, 1970-ci ildən bəri ingilis rəqqasə və aktrisa Elaine Taylor ilə evli olmuşdur.

Mənbə: www.birgun.net