Şuşa Dövlət Musiqili Dram Teatrında Azərbaycan İncəsənət Məktəbi MMC-nin təşəbbüsü və "EMEDİA GROUP" Media Təşkilatının təşkilatçılığı ilə ölkəmizdə ilk dəfə olaraq həssas kateqoriyalı gəncin ifasında sürrealizm üslubunda "Məni dinləyin..." monodrama tamaşasının premyerası baş tutub. Premyerada dövlət nümayəndələri, millət vəkilləri, incəsənət xadimləri və digər qonaqlar iştirak ediblər. Tamaşa başlamazdan əvvəl şəhidlərimizin xatirəsi 1 dəqiqəlik sükutla yad edilib, daha sonra Dövlət Himni səsləndirilib. Azərbaycan İncəsənət Məktəbinin təsisçisi və layihə rəhbəri Fərid Bağırov çıxış edərək hər kəsin bərabər imkanlarla sənətə çıxışını təmin etməyi və cəmiyyətin bütün təbəqələrini bir araya gətirməyi məqsəd qoyduqlarını qeyd edib. Daha sonra "EMEDİA GROUP" Media Təşkilatının sədri Elşən Əliyev çıxış edərək tamaşanın mahiyyətindən danışıb. O, tamaşanın yalnız fərdi bir ifadə forması olmadığını, həm də inklüzivlik və bərabərlik prinsiplərinə diqqət çəkən bir layihə olduğunu vurğulayıb. Tamaşada həmçinin, Leyla Əliyevanın "Dünya yuxutək əriyir" şeirlər toplusundan seçilmiş nümunələrə yer verilib. amaşada baş rolu Fatimə Əsədzadə, dəstəkçi rolunu isə Sunay Əkbərli ifa edib.