Azərbaycan Dövlət Akademik Milli Dram Teatrı növbəti dəfə “Mədəni gənclik” layihəsinə ev sahibliyi edib. Teatrın mətbuat xidmətindən verilən məlumata görə, tələbələr M.F. Axundzadənin müəllifi olduğu “Sərgüzəşti-vəziri-xani-Lənkəran” tamaşasına baxıblar.

Tamaşanın quruluşçu rejissoru mərhum sənətkarımız, Əməkdar incəsənət xadimi, rejissor Vaqif İbrahimoğlu, rejissoru Anar Sadıqov, quruluşçu rəssamı Əməkdar rəssam Rəşid Şerif, bəstəkarı Xalq artisti Səyavuş Kərimidir. Rəqslərin quruluşu Zakir Ağayev və Yelena Ağayevaya məxsusdur.

Səhnə əsərində rolları Xalq artistləri Sabir Məmmədov, Cəfər Namiq Kamal, Əli Nur, Əməkdar artistlər Mətanət Atakişiyeva, Elnar Qarayev, Məzahir Cəlilov, Elxan Quliyev, Aslan Şirin, Kazım Həsənquliyev və Mirzə Ağabəyli, Ayşad Məmmədov, Rəşad Bəxtiyarov, aktyorlar Nigar Güləhmədova, Rüstəm Rüstəmov, Elçin Əfəndi, Elsevər Rəhimov, Ramin Şıxəliyev, Elnur Qədirov, Şəhla Əliqızı, Rada Nəsibova, Cümşüd Zeynalov və İlyas Əhmədov ifa edirlər.

Fərqli rejissor yozumu, parlaq aktyor ifası, rəngarəng səhnə tərtibatı ilə fərqlənən səhnə əsəri tamaşaçıların alqışlarını qazanıb. Tamaşadan sonra təəssüratlarını bölüşən tələbələr tamaşandan böyük zövq aldıqlarını bildirib və müasir Azərbaycan gəncliyi ilə milli mədəniyyət arasında körpü yaratmağa yönələn “Mədəni gənclik” layihəsinin əhəmiyyətindən danışıblar.

Mədəniyyət Nazirliyi tərəfindən həyata keçirilən “Mədəni gənclik” layihəsinin məqsədi gənclərin incəsənətə marağının artırılmasına və mədəni dəyərlərimizə sahib çıxacaq nəslin yetişdirilməsinə töhfə verməkdir.

Akademik Milli Dram Teatrı ilk dəfə mayın 21-də “Ölülər” tamaşası ilə “Mədəni gənclik” layihəsinə öz qapılarını açmışdı.