Azərbaycan Dövlət Akademik Opera və Balet Teatrında görkəmli italyan bəstəkarı C.Puççininin “Madam Batterflyay” operası əsasında hazırlanmış eyniadlı tamaşa yeni tərtibatda tamaşaçılara təqdim ediləcək. Teatrın mətbuat xidmətindən aldığımız məlumata görə, tamaşanın təqdimatı may ayının 14-ü saat 19:00-da baş tutacaq.

Dünya opera sənətinin ən dəyərli nümunələrindən biri olan “Madam Batterflyay“ azərbaycanlı operasevərlərin də böyük maraq göstərdikləri klassik tamaşalardan biridir. Opera gənc yaponiyalı Qeyşanın amerikalı hərbiçi ilə faciəvi məhəbbətindən, geniş mənada isə Qərb və Şərqin mədəni ənənələrinin uyuşmazlığından bəhs edir.

Azərbaycan Dövlət Akademik Opera və Balet Teatrının rəhbərliyi tamaşada əsas partiyanı – Çio-Çio-San partiyasını ifa etmək üçün Musa Cəlil adına Tatarıstan Akademik Opera və Balet Teatrının aparıcı solisti, Tatarstanın Əməkdar artisti, Tatarstan Respublikasının Q.Tukay adına Dövlət mükafatı və vokalçıların Beynəlxalq müsabiqələrinin laureatı Gulnora Qatinanı dəvət edib.

Tamaşada həmçinin Azərbaycanın Əməkdar artistləri Azər Rzazadə (Pinkerton), Səbinə Vahabzadə (Suzuki), Əliəhməd İbrahimov (Qoro), Tural Ağasıyev (Yamadori), solistlər Mahir Tağızadə (Şarples), Tələt Hüseynov (Bonza) və b. çıxış edəcəklər.
Opera tamaşası diriljor, Azərbaycanın Xalq artisti, professor Yalçın Adıgözəlov tərəfindən idarə olunacaq.