Son il yarım ərzində Lənkəran Dövlət Dram Teatrına edilən yeni təyinatlar, eyni zamanda, yeni kadrların teatra cəlb edilməsi bəhrəsini verməkdədir.
Teatrın kollektivi direktor vəzifəsini icra edən İntiqam Hacılı və baş rejissor Anar Babalının rəhbərliyi ilə son altı ay ərzində repertuara altı yeni tamaşa əlavə edib. Bu dövr ərzində teatrın səhnəsində hazırlanan “Yaşayan ölü” (müəllif: Könül Məmmədova, rejissor: Anar Babalı), “Yalançı şahzadə” (müəllif və rejissor: Tərlan Abdullayev) və “Gəl, yazım, gəl, baharım” (müəllif və rejissor: Anar Babalı) tamaşaları seyrçilərə təqdim edilib, “Müqəssir” (müəllif: Əbdürrəhim bəy Haqverdiyev, rejissor: Abdulla Elşadlı), “Cəmilə” (müəllif: Çingiz Aytmatov, rejissor: İmran Əli Qurbanlı) və “Bu da axırı” (mono tamaşa; müəllif: Piter Turini, rejissor: Abdulla Elşadlı) tamaşalarına daxili baxış keçirilib. Teatrın repertuarını zəngilinləşdirən bu tamaşalar yeni mövsümdə tamaşaçıların ixtiyarına veriləcək.
Bundan əlavə, teatrda “Heydər Əliyev İli” çərçivəsində Ulu Öndər Heydər Əliyevə həsr edilmiş üç tədbir baş tutub. Rejissor Emil Əskərovun quruluşunda hazırlanan “20 yanvar” və “26 fevral” kompozisiyaları müvafiq tarixlərdə nümayiş etdirilib. Lənkəran Dövlət Universiteti ilə birgə “Heydər Əliyev və Azərbaycan Teatrı”, Lənkəran Sosial və Aqrar-Texnoloji Kolleci ilə isə “Heydər Əliyev: Azərbaycan mədəniyyəti və təhsili” tədbirləri keçirilib. Hər iki tədbirdən sonra təhsil ocaqlarının kollektivi “Prokuror” tamaşasını izləyib. Lənkəran Dövlət Dram teatrı həmçinin “Heydər Əliyev İli” çərçivəsində Biləsuvar və Lerikdə “Prokuror” tamaşası ilə qastrol səfərində olub. Azərbaycan Yazıçılar Birliyinin Lənkəran bölməsi ilə birgə keçirilən “Heydər Əliyev və Azərbaycan dramaturgiyası” tədbirində isə mövzu ilə yanaşı, “Yerli yazarlarla birgə iş” layihəsi də müzakirə və qəbul edilib.
“Heydər Əliyev İli” çərçivəsində 3 teatr – Azərbaycan Akademik Milli Dram Teatrı, Azərbaycan Dövlət Gənc Tamaşaçılar Teatrı və Sumqayıt Dövlət Dram Teatrı Lənkəran Teatrının qonağı olaraq maraqlı tamaşalar nümayiş etdirib.
“Uçan səhnə” layihəsi ilə Lənkəran rayonunun Bəliton kəndindəki balaca tamaşaçıları sevindirən teatr kollektivi yeni mövsümdə bu layihə ilə digər ucqar kəndlərdə yaşayan uşaqların görüşünə gedəcək.
