Avstriya Akademik Burq Teatrında “Kremator” tamaşasının premyerası olacaq. Premyera oktyabr ayının 13-ü yerli vaxtla saat 20:00-da baş tutacaq. Tamaşanın rejissoru Nikolaus Habjan, bəstəkarı Klaus von Heydenaber, səhnə tərtibatçısı Yakob Brossman, səhnələşdirmənin müəllifi Andreas Karlaganisdir. Səhnə əsərində əsas rolları Dorothee Hartinger, Sabine Haupt, Alexandra Henkel və Michael Maertens ifa edirlər.

Ladislav Fuksun 1967-ci ildə psixoloji qorxu janrında yazdığı “Kremator” romanının motivləri əsasında hazırlanmış tamaşa qrotesk üslubunda olması və qlobal mövzulara toxunması ilə fərqlənir.

Tamaşada hadisələr ailəsinə qarşı son dərəcə diqqətli ata və ər olan Karl Kopfrkinglın ətrafında cərəyan edir. Əsərin qəhrəmanı krematordur, yəni, meyitlərin yandırılması işi ilə məşğul olur. Karl Kopfrkingl tez-tez “krematoriya qanunu və onun faydaları”, “Tibet təbabəti və reinkarnasiya” haqqında kitablar oxuyan, həqiqətən də, cəmiyyətə faydalı iş gördüyünü düşünən bir ailə başçısıdır. Lakin bir gün dostu Reinkenin onlara qonaq gələrək, ari irqini qoruyan nasional sosialistlərin üsullarından söhbət açması - Kopfrkingli müxtəlif fikirlərə qərq edir. Hadisələrin sonrakı gedişatında isə, Kopfrkingl: “Siçovullar orta əsrlərdə vəba xəstəliyini Avropaya necə gətirdi? Xəstəliklərlə bağlı baş verən ölümlərin səbəbi bu qədər bəsitdirmi? Bəs, onun işi həqiqətənmi, cəmiyyəti xəstəliklərdən qorumağa yönəlib?” - kimi onu narahat edən bir çox suallara cavab axtarmaq üçün hərəkətə keçir...

Tərcümə edən: Cavanşir Qasımov