28 fevral 2026-cı il tarixində Şuşa Dövlət Musiqi Dram Teatrında Azərbaycan İncəsənət Məktəbinin təşəbbüsü və “EMEDİA GROUP” Media Təşkilatının təşkilatçılığı ilə inklüziv və autizm spektrli uşaqların iştirakı ilə hazırlanmış "Kainatın sükutunu yaradan uşaqlar" tamaşası nümayiş olunub. 
Tamaşanın nümayişində dövlət nümayəndələri, millət vəkilləri, incəsənət xadimləri və digər qonaqlar iştirak edib. Tamaşa başlamazdan əvvəl şəhidlərimizin xatirəsi 1 dəqiqəlik sükutla yad edilib, daha sonra Dövlət Himni səsləndirilib. Azərbaycan İncəsənət Məktəbinin təsisçisi və layihə rəhbəri Fərid Bağırov çıxış edərək layihənin əhəmiyyətini və inklüziv uşaqlar üçün teatr tamaşalarının sosial və mədəni inkişaf baxımından dəyərini vurğulayıb. O, bu cür layihələrin yalnız sənət sahəsində deyil, həm də cəmiyyətin müxtəlif təbəqələrinə, xüsusilə də həssas qruplara olan münasibətlərin dəyişdirilməsinə böyük töhfə verdiyini qeyd edib. Həmçinin, bu təşəbbüsün genişləndirilməsi ilə əlaqədar gələcək planlardan danışıb.
“EMEDİA GROUP” Media Təşkilatının sədri Elşən Əliyev çıxış edərək layihənin cəmiyyət üçün mühüm əhəmiyyət daşıdığını vurğulayıb. O, inklüziv teatr tamaşalarının, xüsusilə də həssas uşaqların iştirakı ilə həyata keçirilən belə layihələrin sosial şəbəkələrdə və ictimaiyyət arasında daha geniş tanıdılmasının vacibliyini qeyd edib. 
‎Səhnə əsəri insanın daxili səssizliyə, səbirə və dinləmə mədəniyyətinə dönüşünü simvolik və poetik dillə əks etdirən dərin məzmunlu bədii kompozisiyadır. Qeyd edək ki, tamaşada həmçinin, Leyla Əliyevanın “Dünya yuxutək əriyir” adlı şeirlər toplusundan seçilmiş poetik parçalar nümayiş olunub.