“Birinci oxunuş” müsabiqəsi 2009-cu ildən etibarən A.Volodin adına “Beş axşam” festivalı çərçivəsində keçirilir. Builki müsabiqədə qısa siyahıya düşən 8 əsər arasında Azərbaycanlı dramaturq İsmayıl İmanın “10 lobster” pyesi də var. İ.İmanın pyesi ilə yanaşı şort-listdə Konstantin Steşikin “Baş”, Marqarita Kadatskayanın “Ekspertum-patronum”, Dmitri Retixin “Səma müdafiəçiləri meydanı”, Oljas Janhaydarovun “Revolyuşn”, Yekaterina Avqustenyakın “Yüksək slot”, Elektra Libertenin “Nitq sancısı”, Olqa Potapovanın “Qaçmaq olmaq” pyesləri də var.  

Müsabiqənin şərtlərinə görə, pyesləri xüsusi ekspertlər - aktyor Anatoli Belıy, rejissor Vladimir Skvortsov, teatrşünas Alyona Karas, rejissor Anatoli Praudin və dramaturq Svetlana Bajenova seçib. Anatoli Belıy İsmayıl İmanın “10 lobster” pyesinə səs verib. 

Seçilmiş pyeslərin teatrallaşdırılmış oxunuşu 7, 8 və 9 fevral tarixlərində Sankt-Peterburqda “Liteynıdakı” teatrda baş tutacaq.  Oxunuş rejissor Yuliya Makarovanın quruluşunda təqdim olunacaq. 
İsmayıl İmanın Teatro.az sənət portalına verdiyi məlumata görə, bu, dramaturqun sözügedən müsabiqədə üçüncü iştirakıdır. Belə ki, dramaturqun “Astara bağları” pyesi 2018-ci ildə, “Balidən sonra” əsəri isə 2021-ci ildə “Birinci oxunuş” müsabiqəsinin əsas proqramında iştirak edib.