AMEA-nın Memarlıq və İncəsənət İnstitutunda  görkəmli teatrşünas, AMEA-nın müxbir üzvü, professor İnqilab Kərimovun 90 illiyi münasibəti ilə “Milli teatrşünaslığın inkişafında İnqilab Kərimovun rolu” mövzusunda on-line elmi sessiya keçirilib.
Elmi sessiyanı giriş sözü ilə açan İnstitutun direktoru, AMEA-nın müxbir üzvü, sənətşünaslıq doktoru, professor Ərtegin Salamzadə görkəmli teatrşünas-alimin çoxşaxəli yaradıcılığından, pedoqoji fəaliyyətindən, insani kefiyyətlərindən danışaraq bu gün İnqilab Kərimovun  90 illiyinin qeyd edilməsini onun Azərbaycan elmi qarşısında göstərdiyi xidmətlərin nəticəsi kimi dəyərləndirib. 
Sessiyada  Əməkdar incəsənət xadimi, professor Məryəm Əlizadə “İnqilab Kərimovun tədqiqatları Azərbaycan teatr tarixinin güzgüsü kimi”, sənətşünaslıq üzrə fəlsəfə doktoru, dosent Vidadi Qafarov ”İnqilab Kərimovun sənət baxışları”, sənətşünaslıq üzrə fəlsəfə doktoru, dosent  Nərminə Ağayeva “İnqilab Kərimovun teatr-tənqidi görüşləri şəxsiyyət və zaman müstəvisində” və sənətşünaslıq üzrə fəlsəfə doktoru Məlahət Ağayeva “İnqilab Kərimovun bədii-publisistik yaradıcılığı” adlı məruzələrlə çıxış ediblər.
Məruzələrdən sonra “Kulturalogiya və incəsənətin nəzəriyyəsi” söbəsinin müdiri, sənətşünaslıq doktoru, professor  Rəna Abdullayeva söz alaraq İnqilab Kərimov haqqında həm elm xadimi, həm də bir insan kimi öz xatirələrini bölüşüb.
Sonda İnqilab Kərimovun qızı, sənətşünaslıq üzrə fəlsəfə doktoru, dosent Gülnarə Kərimova çıxış edərək, atası İnqilab Kərimova göstərdikləri ehtirama, 90 illiyi münasibəti ilə elmi sessiya keçirdiklərinə görə İnstitutun rəhbərliyinə, mərhumun vaxtı ilə başçılıq etdiyi “Teatr, kino və televiziya” şöbəsinin əməkdaşlarına və iştirakçılara öz dərin minnətdarlığını bildirib.