Avrasiya teatrlar birliyinin, Portuqaliya Mədəniyyət nazirliyinin, CTB- Comphania de Teatro de Braga və Braga şəhər bələdiyyəsinin birgə keçirdiyi "MİT III" Beynəlxalq Teatr Festivalı başa çatıb. 19-27 iyul 2024-cü il tarixində baş tutan festivalda ölkəmizi Azərbaycan Mədəniyyət Nazirliyi və Gəncə Şəhər İcra Hakimiyyətinin dəstəyi ilə iştirak edən Gəncə Dövlət Milli Dram Teatrı təmsil edib. Festivalda Gəncə Teatrının rejissor Tural Vaqifoğlunun quruluşunda təqdim etdiyi “Kral ölür” (E.İonesko) tamaşası "Ən yaxşı tamaşa geyimi" və "QRAN-PRİ" mükafatına layiq görülüb. Xatırladaq ki, tamaşanın quruluşçu rəssamı və geyim eskizlərinin müəllifi Mustafa Mustafayevdir. Tamaşada rolları Əməkdar artistlər Elxan Yunis, İlham Hüseynov, Sevda Orucova, Kəmalə  Məmmədova,  aktyorlar  Güntəkin Mehdiyeva və Ruslan Hüseynov ifa edirlər.

Festivalda "Ən yaxşı kişi rolu" Braziliya teatrının aktyoruna, "Ən yaxşı qadın rolu" İtaliya teatrının aktrisasına, "Ən yaxşı rejissor işi" İspaniya teatrına və "Ən yaxşı ssenari" mükafatı isə Serbiya teatrına təqdim olunub.