Azərbaycan Dövlət Gənc Tamaşaçılar Teatrı tamaşaçılara yeni səhnə əsərlərini təqdim etməyə hazırlaşır. Teatrın mətbuat xidmətindən aldığımız məlumata görə, Gənc Tamaşaçılar Teatrı dekabr ayının 20-si Pərviz Seyidlinin “Mələk”, 25-i isə İsmayıl İmanın “Balaca, yaramaz məxluq” adlı pyesləri əsasında hazırlanmış eyniadlı premyera tamaşlarını, saat 19:00-da tamaşaçılara təqdim edəcək.

Pərviz Seyidlinin psixoloji-dram janrında qələmə aldığı “Mələk” adlı pyesi əsasında hazırlanmış eyniadlı tamaşanın quruluşçu rejissoru Ayla Osmanova, əsas rolların ifaçıları isə Ramil Məmmədov və Aygün Fətullayevadır. Tamaşa pandemiyanın bəşəriyyəti sürüklədiyi bəladan, ailələri düçar etdiyi faciələrdən bəhs edir.

Növbəti premyeranın ədəbi əsası, İsmayıl İmanının “Balaca, yaramaz məxluq” pyesi də psixoloji-dram janrında yazılıb. Bu səhnə əsərinin quruluşçu rejissoru Bəhram Osmanov, əsas rolların ifaçıları isə Nəsibə Eldarova, İlham Əsədov və İlahə Əmirullayevadır. Tamaşanın mövzusu son zamanlar cəmiyyətimizdə yeniyetmə və gənclər arasında baş verən intihar hadisələrinin əsas səbəbləri üzərində qurulub. Problemi harada axtarmaq lazımdır: Cəmiyyətdə, ailədə, məktəbdə, biganəlikdə, yoxsa ikili həyat tərzi standartlarında?