21 iyun 2023-cü il tarixində Yunanıstanın Elefsina şəhərində “2023 Elefsina - Avropa Mədəniyyət Paytaxtı” proqramı çərçivəsində Festival Akademiyasının "Mystery 45. Gənc Festival Menecerləri Atelyesi" öz işinə başlayıb.

7 günlük təlim proqramı iyunun 27-dək davam edəcək. Proqramın əsasını dünyanın müxtəlif ölkələrindən gələn festival təşkilatçıları və sənət adamlarının festivalların müasir dünyadakı rolu haqqında geniş müzakirələr aparması təşkil edir. 

Ölkələrarası mədəni əlaqələrin inkişafı, festival təşkilatçıları arasında gələcək əməkdaşlıq və fikir mübadiləsini təşviq etmək üçün unikal imkan yaradan layihədə festivalların davamlılığı, kurator modelləri, bədii əməkdaşlıq və həmrəylik, fandrayzinq, teatr sahəsində texnoloji yeniliklər, irqi və cinsi bərabərlik, festival və təşkilatların deklonoziyası kimi bir sıra qlobal mövzuların müzakirəsi nəzərdə tutulub.

Atelyedə Azərbaycan da daxil olmaqla 22 ölkədən - Banqladeş, Bolqarıstan, Kanada, Danimarka, Konqo Demokratik Respublikası, Misir, Yunanıstan, Haiti, Hindistan, İsrail, İtaliya, Keniya, Koreya, Livan, Böyük Britaniya, Nigeriya, Filippin, Seneqal, Cənubi Afrika, Ukrayna, Zimbabvedən nümayəndələr, festival təşkilatçıları iştirak edir.  

Tədbirdə ölkəmizi teatrşünas Emin Əliyev "4.4 Qısa Tamaşalar Festivalı" layihəsi ilə təmsil edir.

Qeyd edək ki, Festival Akademiyası Avropa Festivallar Assosiasiyasının təşəbbüsü ilə yaradılıb və Açıq Cəmiyyət Fondu və Avropa Birliyi tərəfindən dəstəklənir.