CHARACTERS Müasir Dramaturgiya Festivalı çərçivəsində Çili dramaturqu və rejissoru Pablo Manzinin “Barbarların yaşadığı yer” (“Donde Viven los Bárbaros”) pyesinin oxunuşu keçiriləcək. Layihə Çilinin Azərbaycandakı səfirliyinin dəstəyi ilə həyata keçirilir.

2023-cü ilin noyabr ayından başlayaraq CHARACTERS Festivalı çərçivəsində Azərbaycanda müasir dramaturgiyanın populyarlaşdırılması və inkişafına yönəlmiş bir sıra tədbirlər həyata keçirilib. Əsas tədbir pyes müsabiqəsi olub, onun nəticələrinə əsasən qaliblər seçilib və 2024-cü ilin mart ayında Rəşid Behbudov adına Azərbaycan Dövlət Mahnı Teatrının səhnəsində pyes oxunuşları keçirilib. CHARACTERS müxtəlif məkanlarda Azərbaycan və xarici müəlliflərin müasir pyeslərinin oxunuş proqramını davam etdirir.

3 iyul 2024-cü il tarixində Kapellhaus səhnəsində “Barbarların yaşadığı yer” pyesinin oxunuşu Azərbaycan dilində təqdim olunacaq. Pyesinin ispan dilindən tərcüməsini İlahə Əkbər həyata keçirib, mətnin redaktoru şair və tərcüməçi Qismət Rüstəmovdur. Oxunuşun quruluş müəllifi Azərbaycan Dövlət Akademik Rus Dram Teatrının və Azərbaycan Dövlət YUĞ Teatrının rejissoru Tural Mustafayevdir. Oxunuşda Azərbaycan Dövlət Mədəniyyət və İncəsənət Universitetinin tələbələri iştirak edirlər.

Pablo Manzinin 2015-ci ildə yazdığı pyesi müasir dünyada zorakılıq və qorxu mövzusunu, cəmiyyət daxilindəki sosial-siyasi fikir ayrılıqlarını gündəmə gətirir, miqrantların problemlərinə və gender kimliyinə toxunur. Tədbir başlamazdan əvvəl Çilinin Azərbaycandakı diplomatik missiyasının rəhbəri Cankarlo Alberti və CHARACTERS Müasir Dramaturgiya Festivalının kuratoru və təşkilatçısı İsmayıl İman çıxış edəcəklər. Oxunuşdan sonra yaradıcı heyətinin və tamaşaçıların iştirakı ilə müzakirə aparılacaq.

Tarix: 03.07.2024
Vaxt: 18:30

Məkan: Kapellhaus
Ünvan: Bakı, 28 May küç., 35

Giriş: sərbəstdir
Yaş həddi: 18+