TEATRO

TEATRO

sənət portalı

post-title

CHARACTERS Müasir Dramaturgiya Festivalının münsiflər heyəti müəyyənləşib

       CHARACTERS Müasir Dramaturgiya Festivalı çərçivəsində 8 yanvar 2024-cü il tarixində Bakı Marionet Teatrında dramaturq İsmayıl İmanın “Niyə pyes yazmaq lazımdır?” adlı ustad dərsi keçirilib.

Ustad dərsi zamanı CHARACTERS Müasir Dramaturgiya Festivalının kuratoru İsmayıl İman festivalla bağlı bir neçə xəbər paylaşıb. Məlumat verilib ki, pyeslərin qəbul tarixi 15 fevral 2024-cü il tarixinədək uzadılır. Pyeslər münsiflər heyətinə anonim şəkildə göndərilir, müəllif qeyd olunmur. 60 min işarədən (boşluqlarla) çox olmaması şərti ləğv olunur. Müsabiqədə əvvəllər səhnəyə qoyulmayan pyeslərin iştirakına icazə verilir. Bu bənddə peşəkar teatr səhnəsi nəzərdə tutulur.

Bildirilib ki, EURODRAM – European Network for Drama in Translation (Avropanın dram əsərlərin tərcümə şəbəkəsi) CHARACTERS Müasir Dramaturgiya Festivalının tərəfdaşı kimi qoşulub. Festivalda qalib gələn pyeslər EURODRAM Azərbaycan Komitəsi tərəfindən təqdim olunan pyeslər kimi avtomatik seçiləcək.

Festivalda münsiflər heyətinin tərkibi açıqlanıb: 

Pyes müsabiqəsinin münsiflər heyətinə aşağıdakı mütəxəssislər daxildir.

-İsrafil İsrafilov, teatrşünas, Əməkdar incəsənət xadimi, sənətşünaslıq üzrə fəlsəfə doktoru, professor, ADMİU-nun Dram rejissoru və səhnə plastikası kafedrasının müdiri;

-Mikayıl Mikayılov, teatr rejissoru, Azərbaycan Dövlət Yuğ Teatrının baş rejissoru;

-Tural Mustafayev, teatr rejissoru, Azərbaycan Dövlət Akademik Rus Dram Teatrının və Azərbaycan Dövlət Yuğ Teatrının rejissoru;

-Elçin Cəfərov, teatrşünas, sənətşünaslıq üzrə fəlsəfə doktoru, ADMİU-nun Teatrşünaslıq kafedrasının dosenti;

-Aliyə Dadaşova, teatrşünas, ADMİU-nun Teatrşünaslıq kafedrasının müəllimi.

İsveçrə İnkişaf və Əməkdaşlıq Təşkilatının dəstəyi ilə həyata keçirilən layihənin tərəfdaşları Azərbaycan Dövlət Mədəniyyət və İncəsənət Universiteti, Azərbaycan Dövlət YUĞ Teatrı, Bakı Marionet Teatrı, Teatro.az sənət portalı, Katalizator Art Hub və TOTD İctimaiyyətlə əlaqələr təşkilatıdır.

Festival çərçivəsində ilk mərhələ 18-50 yaş arası dramaturqların son 5 il ərzində yazdığı pyeslərdən ibarət dramaturgiya müsabiqəsidir. Müsabiqəyə qəbul edilən pyeslər jüri tərəfindən oxunaraq qiymətləndiriləcək. Qalib gələn pyeslər 2024-cü ilin yazında rejissor oxunuşu şəklində teatr mütəxəssislərinə və tamaşaçılara təqdim olunacaq, quruluş üçün Azərbaycanın dövlət və özəl teatrlarına tövsiyə olunacaq. Birinci yerin qalibi olan pyes festivalın tərəfdaşı YUĞ Dövlət Teatrının səhnəsində tamaşaya qoyulacaq.

Load Time (S) : 0.000249