CHARACTERS Müasir Dramaturgiya Festivalı EURODRAM – Avropanın dram əsərlərinin tərcümə şəbəkəsi ilə əməkdaşlıq çərçivəsində Azərbaycan dilində yazılmış pyes müsabiqəsini elan edir.

Layihənin məqsədi – müasir mövzuları əks etdirən və Azərbaycanın teatr məkanını zənginləşdirən yeni pyeslərin yaradılmasını, yayılmasını və səhnələşdirilməsini təşviq etməkdir. 2023-cü ildən dramaturq İsmayıl İmanın kuratorluğu ilə fəaliyyət göstərən CHARACTERS Festivalı müəlliflərin pyes yazmaq həvəsini dəstəkləməyi, həmçinin dramaturqlar, rejissorlar və teatrlar arasında əlaqələri gücləndirməyi hədəfləyir.

Festival indiyədək həm yerli, həm də xarici müəlliflərin müasir pyeslərinin oxunuşları və tədris proqramları ilə yanaşı, iki müsabiqə təşkil edib – orijinal pyeslər və xarici pyeslərin Azərbaycan dilinə tərcümələri üzrə. 2024-cü ildə Şəbnəm Xeyrullanın “Arqon” adlı pyesi qalib seçilərək səhnə həyatı qazanıb – əsər YUĞ Dövlət Teatrında və ölkənin bir neçə digər səhnəsində tamaşaya qoyulub.

2026-cı il müsabiqəsinə 18–50 yaş arası dramaturqların son 5 il ərzində yazdıqları pyeslər qəbul olunur. Müsabiqəyə təqdim edilən əsərlər teatrşünaslar İsrafil İsrafilov, Elçin Cəfərov, Aliyə Dadaşova və rejissorlar Mikayıl Mikayılov ilə Tural Mustafayevdən ibarət Münsiflər heyəti tərəfindən qiymətləndiriləcək.

Ərizələrin qəbulu 1 noyabr 2025-ci ildən 1 fevral 2026-cı ilədək davam edəcək. Nəticələrə əsasən üç qalib seçiləcək və onların adları 2026-cı ilin mart ayında elan olunacaq.

CHARACTERS Müasir Dramaturgiya Festivalı çərçivəsində keçirilən dramaturgiya müsabiqəsinin
QAYDALARI

1. Dramaturgiya müsabiqəsi

1.1. Dramaturgiya müsabiqəsi CHARACTERS Müasir Dramaturgiya Festivalının bir hissəsidir.

1.2. Müsabiqə çərçivəsində pyes qəbulu elan olunur, qəbulun nəticəsi kimi Münsiflər heyəti uzun siyahı, qısa siyahı və üç qalibi (birinci, ikinci və üçüncü yerlər) seçəcək.

1.3. Uzun siyahının və qısa siyahının mövcudluğu təqdim olunan pyeslərin sayından və təqdim olunan materialların keyfiyyətindən asılıdır.

1.4. Birinci, ikinci və üçüncü yerlərin qalibi olan pyes müəlliflərinə festivalın sertifikatları veriləcək.

1.5. Birinci, ikinci və üçüncü yerləri tutan pyeslər quruluş üçün Azərbaycanın dövlət və özəl teatrlarına tövsiyə olunacaq.

2. Müəlliflər və pyeslər

2.1. Müsabiqədə yaşadığı şəhər və ölkədən, təhsilindən və peşəsindən asılı olmayaraq, Azərbaycan dilində yazan müəlliflərin iştirakına icazə verilir.

2.2. Pyeslərin dili — Azərbaycan dilidir.

2.3. Müəlliflərin yaş həddi — 18 yaşdan 50 yaşa qədərdir.

2.4. Müsabiqədə müraciət zamanı peşəkar teatr səhnəsində qoyulmayan və son beş ildə yazılmış pyeslərin iştirakına icazə verilir.

2.5. Müsabiqədə eyni müəllifin üçdən çox pyesi iştirak edə bilməz.

2.6. Başqa müəllifin nəsr əsəri əsasında səhnələşdirilmiş pyeslər müsabiqəyə qəbul olunmur.

2.7. İbtidai və orta məktəb yaşlı uşaqlar üçün pyeslər nəzərə alınmır.

2.8. Əvvəlki illərdə müsabiqəyə təqdim edilmiş pyeslər nəzərə alınmır.

2.9. Tədqim olunan pyeslərə mövzu və janr məhdudiyyəti qoyulmur.

2.10. Təqdim olunan pyeslər rəy və ya resenziyadan keçmirlər.

3. Müddət

3.1. Pyeslər 1 fevral 2026-cı il tarixinədək yalnız elektron formatda (pdf, doc, yaxud docx formatlarında) characters.drama@gmail.com elektron poçt ünvanına göndərilməlidir.

3.2. Məktubda müəllif haqqında aşağıdakı məlumatlar qeyd olunmalıdır: ad və soyad; doğum tarixi; yaşayış yeri; təhsili; peşəsi; pyesin yazılma ili; əlaqə məlumatları – telefon nömrəsi və elektron poçt ünvanı. Bu məlumatlar göstərilmədiyi halda, pyeslər müsabiqəyə qəbul edilməyəcək.

3.3. Müsabiqənin və ümumiyyətlə, festivalın şərtləri və mərhələləri dəyişə bilər. Bütün dəyişikliklər barədə mediada və festivalın sosial şəbəkə hesablarında (@characters.az Instagram səhifəsi) məlumat yerləşdiriləcək.