Britaniya Şurasının Azərbaycandakı nümayəndəliyinin dəstəyi ilə CHARACTERS Müasir Dramaturgiya Festivalı 10–12 iyun 2025-ci il tarixlərində Bakıda yerləşən Azərbaycan Dövlət Akademik Musiqili Teatrında keçiriləcək xüsusi “CHARACTERS Britaniya dramaturgiyasını təqdim edir” adlı proqramı elan edir.

Layihəyə tanınmış britaniyalı dramaturq Rori Mullarki tərəfindən aparılacaq üçgünlük dramaturgiya təlimi və müasir Britaniya dramaturgiyasından Azərbaycan dilinə tərcümə olunmuş üç pyesin oxunuşu daxildir. Bütün tədbirlərdə iştirak ödənişsizdir, lakin öncədən qeydiyyat mütləqdir.

Rori Mullarki – mükafatlı dramaturq, libretto müəllifi və tərcüməçidir. Onun əsərləri Britaniyanın və dünyanın müxtəlif teatrlarında səhnəyə qoyulub. Onun Bakıya səfəri Azərbaycan teatr icması üçün çağdaş Britaniya dramaturgiyasının dili, strukturu və tematikası ilə birbaşa tanış olmaq baxımından unikal fürsət yaradır.

Proqram Azərbaycan Dövlət Akademik Musiqili Teatrı və EURODRAM – Avropanın dram əsərlərinin tərcümə şəbəkəsinin tərəfdaşlığı ilə həyata keçirilir.

CHARACTERS Festivalının kuratoru İsmayıl İman qeyd edir: “Xarici müəlliflərlə – xüsusilə də britaniyalı dramaturqlarla təcrübə mübadiləsi bizim dramaturqlar – istər yeni başlayanlar, istərsə də təcrübəli qələm sahibləri üçün son dərəcə dəyərli ola bilər. Bu, teatra, onun formalarına və ifadə vasitələrinə yenidən nəzər salmaq, həmçinin onun bu gün necə görünə biləcəyini və tamaşaçı ilə hansı səslə danışa biləcəyini araşdırmaq üçün bir fürsətdir”.

Proqramda aşağıdakı pyeslər təqdim olunacaq:

• Rori Mullarki “Xırmanda” – dərinləşən sinfi uçurumlar və tanış dünyanın dağılması fonunda böyümə hekayəsi.
• Zinni Harris “Sübh çağı görüşək” – itkini, yaddaşı və artıq gec olduğu anlarda belə yaxın insanla danışmağa duyulan ehtiyacı araşdıran ikinəfərlik zərif və emosional pyes.
• Rori Mullarki “Turizm” – mədəni fərqlər, yad məkanda azmaq və ümumi məna axtarışına dair kəskin ironiyalı pyes.

Gün ərzində, monoloq, dialoq və hekayə quruluşu kimi əsas dramaturji elementlərə fokuslanan “Dramaturgiyaya giriş” adlı təlimlər keçiriləcək, pyes oxunuşları isə hər axşam baş tutacaq.

Tədbirin tam proqramı aşağıda təqdim olunur.

Proqram:

10.06.2025, çərşənbə axşamı

12:00–14:00 — Rori Mullarki ilə “Dramaturgiyaya giriş”

Qeydiyyat linki: https://forms.gle/9qMiAsYGsNZZj1D19

GÜN 1: MONOLOQ. Monoloqu ifadəli edən nədir? Bir iştirakçı üçün dramatik mətn necə yazılır? Qrup iştirakçıları öz tərcümeyi-hallarından və ətraf mühitdən ilhamlanaraq yeni mətn üzərində işləyəcəklər.

14:00–15:00 — Fasilə

15:00–18:00 — “Dramaturgiyaya giriş”. GÜN 1: MONOLOQ (davamı)

18:00–19:00 — Fasilə

19:00 — Rori Mullarkinin “Xırmanda” pyesinin oxunuşu və müzakirəsi

Qeydiyyat linki: https://forms.gle/pLbvdPjguR3GtRTa7

11.06.2025, çərşənbə

11:00–14:00 — Rori Mullarki ilə “Dramaturgiyaya giriş”

GÜN 2: DİALOQ. Dialoqu canlı edən nədir? Hansı dialoq üslubları mövcuddur? Nitq və pauzanın birləşməsindən təsirli səhnə yaratmaq üçün necə istifadə etmək olar? Hadisələrin inkişafı, tamaşaçının təəccübləndirilməsi və sevindirilməsi üçün remarkalardan necə istifadə edə bilərik? İştirakçılar bu suallar əsasında müxtəlif bacarıqları inkişaf etdirəcək və yeni bir dramatik səhnə üzərində işləyəcəklər.

14:00–15:00 — Fasilə

15:00–18:00 — “Dramaturgiyaya giriş”. GÜN 2: DİALOQ (davamı)

18:00–19:00 — Fasilə

19:00 — Zinni Harrisin “Sübh çağı görüşək” pyesinin oxunuşu və müzakirəsi

Qeydiyyat linki: https://forms.gle/d9mw9tECb2ba8WaF9

12.06.2025, cümə axşamı

11:00–14:00 — Rori Mullarki ilə “Dramaturgiyaya giriş”

GÜN 3: HEKAYƏ. Bugünkü dünyanın ən önəmli sualları hansılardır? 2025-ci ildə insan olmağın mənasını açmaq üçün hansı hekayələri danışmalıyıq? Qrup iştirakçıları yeni pyes planı yaratmaq üçün hekayə quruluşu, janr və üslub üzərində işləyəcək.

14:00–15:00 — Fasilə

15:00–18:00 — “Dramaturgiyaya giriş”. GÜN 3: HEKAYƏ (davamı)

18:00–19:00 — Fasilə

19:00 — Rori Mullarkinin “Turizm” pyesinin oxunuşu və müzakirəsi

Qeydiyyat linki: https://forms.gle/SLcNVUeGzjJXgEQN9