10 mart – Milli Teatr Günündə CHARACTERS Müasir Dram Hərəkatı EURODRAM – Avropanın dram əsərlərinin tərcümə şəbəkəsi ilə əməkdaşlıq çərçivəsində Azərbaycan dilində yazılmış pyeslər üzrə keçirilən müsabiqənin yekun nəticələrini açıqlayıb.

Əməkdar incəsənət xadimi, sənətşünaslıq doktoru, professor İsrafil İsrafilov, sənətşünaslıq doktoru, dosent Elçin Cəfərov, YUĞ Dövlət Teatrının rejissoru Mikayıl Mikayılov, Akademik Rus Dram Teatrının rejissoru Tural Mustafayev və ADMİU-nun Teatrşünaslıq kafedrasının müəllimi, teatrşünas Aliyə Dadaşovadan ibarət münsiflər heyəti CHARACTERS 2026 dramaturgiya müsabiqəsinin üç qalibini müəyyən edib:

1-ci yer – Jalə İsmayıl “Quyuda bitən qamışın monoloqu”
2-ci yer – Abdulla Elşadlı “_”
3-cü yer – Hacı Səfərov “Eyay”

Bu ilin qalibi dramaturq Jalə İsmayıl əvvəlki CHARACTERS pyes müsabiqəsində ikinci yeri tutmuşdu. Bundan əlavə, CHARACTERS tərəfindən 2025-ci ildə keçirilmiş pyes tərcümələri müsabiqəsində o, rumın dramaturqu Mihaela Mikailovun “Din müəllimi” pyesinin tərcüməsinə görə üçüncü yerə layiq görülmüşdü.

Teatr rejissoru Abdulla Elşadlı müsabiqədə ilk dəfə iştirak edərək ikinci yerə layiq görülüb. Daha çox kinotənqidçi kimi tanınan Hacı Səfərov isə iki il əvvəlki nəticəsini təkrarlayaraq yenidən üçüncü yeri tutub.

Xatırladaq ki, pyeslərin qəbulu 1 noyabr 2025-ci ildən 15 fevral 2026-cı ilədək davam edib. Müsabiqəyə 3 ölkə və 7 şəhərdən 17 müəllif tərəfindən təqdim olunmuş 27 pyes qəbul edilib. Qalib pyeslər Azərbaycanın dövlət və özəl teatrlarına tövsiyə olunacaq.

CHARACTERS Müasir Dram Hərəkatının bədii rəhbəri İsmayıl İmanın sözlərinə görə, dramaturgiya müsabiqəsinin hər iki ildən bir keçirilməsi planlaşdırılır.

Qaliblərin sertifikatlarla təltif olunması 2026-cı ilin aprel ayında baş tutacaq.