CHARACTERS Müasir Dramaturgiya Hərəkatı EURODRAM – Avropanın dram əsərlərinin tərcümə şəbəkəsi ilə əməkdaşlıq çərçivəsində Azərbaycan dilində yazılmış pyeslər üzrə müsabiqənin ilkin nəticələrini açıqlayıb.

CHARACTERS bədii rəhbəri, dramaturq İsmayıl İman müsabiqənin əhəmiyyəti barədə belə deyib: “Bu müsabiqə artıq ikinci dəfə keçirilir və biz müasir Azərbaycan dramaturgiyasında müəyyən tendensiyaları, eləcə də onun mümkün inkişaf istiqamətlərini müşahidə edə bilirik. 2023-cü ildən bəri CHARACTERS özü də transformasiya olunub — bu gün o, festivalı, dramaturgiya müsabiqəsini və öz tamaşaları olan teatrı birləşdirən bir hərəkatdır.”

Pyeslərin qəbulu 1 noyabr 2025-ci ildən 15 fevral 2026-cı ilədək davam edib. Müsabiqəyə 17 müəllifdən 27 pyes qəbul olunub. Daha 3 pyes müsabiqə şərtlərinə uyğun olmadığı üçün qəbul edilməyib. Müsabiqənin coğrafiyası 3 ölkəni və 7 şəhəri əhatə edib — Bakı və Gəncədən tutmuş London və Madridədək. Müəllifləri düşündürən mövzular arasında 44 günlük Vətən müharibəsi, süni intellekt, qaçış və evə qayıdış, nəsillərarası münaqişə, insan təbiətinin duallığı, yaddaş və unudulmuş xatirələr kimi istiqamətlər diqqəti cəlb edir.

Əməkdar incəsənət xadimi, sənətşünaslıq doktoru, professor İsrafil İsrafilov, sənətşünaslıq doktoru, dosent Elçin Cəfərov, YUĞ Dövlət Teatrının rejissoru Mikayıl Mikayılov, Akademik Rus Dram Teatrının rejissoru Tural Mustafayev, ADMİU-nun Teatrşünaslıq kafedrasının müəllimi, teatrşünas Aliyə Dadaşovadan ibarət münsiflər heyəti pyeslərlə tanış olub və qısa siyahını müəyyənləşdirib.

CHARACTERS 2026 dramaturgiya müsabiqəsinin qısa siyahısına 7 pyes daxil edilib (müəlliflər əlifba sırası ilə göstərilib):

• Abdulla Elşadlı “Çivinlər”
• Abdulla Elşadlı “_”
• Şəbnəm Xeyrulla “Saat piri”
• Jalə İsmayıl “Kasablanka sakinləri”
• Jalə İsmayıl “Qladiator döyüşü”
• Jalə İsmayıl “Quyuda bitən qamışın monoloqu”
• Hacı Səfərov “Eyay”

Münsiflər heyətinin üzvü Elçin Cəfərov qeyd edib: “Maraqlıdır ki, qısa siyahıda cəmi 4 müəllif yer alıb. Onlardan üçü 2024-cü ildə müsabiqənin qısa siyahısına düşmüşdü. Bu müəlliflərin sabitliyi sevindiricidir, lakin məncə, yeni adlara da hər zaman ehtiyac var.”

Müsabiqənin qalibi olan üç pyesin adı 10 mart - Milli Teatr Günündə elan olunacaq.