Ötən ilin mart ayından koronavirus pandemiyası səbəbi ilə qapılarını bağlayan Brodvey teatrları, ilk dəfə 36 dəqiqəlik tamaşa ilə pərdələrini seyrçilərin üzünə yenidən açıb.

Pandemiyadan ən çox təsirlənən sahələrdən biri də səhnə sənətləridir. Nyu York sənət aləminin mərkəzi sayılan Brodvey də keçən il pandemiya elanından sonra qapılarını bağlamaq məcburiyyətində qalıb.

Lakin şənbə günü Brodveydə teatr pərdələri yenidən açılıb və 150 ​​nəfər üçün 36 dəqiqəlik xüsusi bir tamaşa göstərilib. Müqəddəs Ceyms Teatrında baş tutan performansda Toni mükafatı laureatları, məşhur aktyor Natan Leyn və xareoqraf Savion Qlover çıxış ediblər. 


                            
Koronavirus səbəbiylə sərt tədbirlərin görüldüyü şoudan əvvəl tamaşaçılardan COVID-19 testi və ya peyvənd olunduqlarına dair sənəd istənilib. 1700 nəfərlik tutumu olan tamaşa salonunda məsafə qoyularaq yerləşdirilən tamaşaçılar Aktyorlar Fondu və Broadvey Cares Equity Fights AIDS kimi cəmiyyətlərin üzvlərindən ibarət olub. 

Tamaşa bitdikdən sonra Qlover, “Nev York Times” qəzetinə verdiyi müsahibədə “bir az gərgin olsa da özünü xoşbəxt, qəribsəmiş və təhlükəsiz hiss etdiyini” söyləyərək, səhnədə çıxış etmək üçün darıxdığını qeyd edib. Leyn isə 36 dəqiqəlik tamaşa haqqında bu sözləri bildirib: “Şou pandemiya qaydalarına uyğun olaraq keçirildi. Ümid edirəm ki, bu, Brodveyin yenidən açılması üçün bir başlanğıcdır”.