Rusiya Dövlət Akademik Böyük Teatrı 2020-ci ildə koronavirus pandemiyası ilə əlaqədar satılmamış biletlərə görə 1.3 milyard rubl məbləğində pul itirib.

Teatrın mətbuat katibi Katerina Novikova “İnterfaks”a bildirib ki, teatra dəymiş maddi itkilər haqqında danışsaq, 2020-ci ildə Böyük Teatrda təkcə satılmayan biletlərdən dəyən ziyan 1.3 milyard rubl təşkil edib.  Bu rəqəm pandemiyadan qabaq teatrın tamaşaçı salonunun faktiki olaraq dolma səviyyəsinə - 98%-ə nəzərən hesablanıb.

K.Novikovanın sözlərinə görə, teatrda nəzərdə tutulan qastrolların və tamaşaların ləğvi, repertuardakı dəyişikliklər və digər məsələlərlə əlaqədar olan maliyyə itkilərini indi qiymətləndirmək çətindir, çünki bu məbləğ hardasa mart ayında, aprel ayının əvvəlində cəmlənəcək və bundan sonra dəymiş ümümi itkilər haqqında danışmaq mümkün olacaq.

2021-ci il üçün proqnozlardan danışarkən teatrın mətbuat katibi qeyd edib ki, həm koronavirus, həm də mədəniyyət müəssisələrinin vəziyyətinin necə olacağını cavablandırmaq zamanın məsələsidir.

Biz hər halda ümid edək ki, teatra tamaşaçı buraxılışı (zalda maksimum tamaşaçı həddi) 25%-dən 50%-ə, sonra 75%-ə və nəhayət 100%-ə qaldırılacaq. Ancaq insanlarda hələ də qorxu var və pandemiyadan əvvəl olduğu kimi hərkəs dərhal teatra gəlməyə hazır deyil. Tamaşaçıların teatra nə qədər tez gələcəkləri sualına cavab vermək çox çətindir, - deyə mətbuat katibi bildirib.

Reklam