16 fevral tarixində “KATALİZATOR ArtHub” tərəfindən təşkil edilən “Böyük Britaniyanın çağdaş dramaturgiyası: TANIMA” layihəsinin ikinci tədbiri keçirilib.

ADMİU-nun professor-müəllim heyəti, Britaniya Şurasının əməkdaşları, teatr xadimləri və media nümayəndələrinin iştirakı etdiyi ikinci tədbir Azərbaycan Dövlət Mədəniyyət və İncəsənət Universitetinin Elmi Şura otağında baş tutub. Tədbirin ilk hissəsinə keçməzdən öncə layihənin koordinatoru Əli Hacılı çıxış edərək qonaqlara  açılış  günü, görüşlərin proqramı və layihə komandası barədə məlumat verib.

Tədbirin birinci hissəsində  “1990-cı illər Böyük Britaniyada dramaturgiya, teatr sənəti, pyes yaradıcılığı” mövzusunda seminar baş tutub. Seminarın spikeri Böyük Britaniya Kral İncəsənət Cəmiyyətinin üzvü, jurnalist, teleaparıcı, pedaqoq və teatr tənqidçisi  Aleks Syerts (Aleks Sierz) olub.

Seminardan sonra universitetin kiçik səhnəsində “Postmüharibə dövrü Britaniya  dramaturgiyasında müharibə mövzusu” adlı müzakirə keçirilib. Teatrşünaslıq kafedrasının müəllimi Emin Əliyevin moderatorluğu ilə keçirən bu hissədə o, 20-ci əsrin ortalarında İkinci Dünya müharibəsinin bitməsi, “Soyuq müharibə” dövrünün başlaması, bütün bu hadisələr fonunda müasir Britaniyalı dramaturqların hadisələrə refleksi və onların yaradıcılığında müharibə mövzusunun yerindən danışıb.

Tədbirin davamında Kəril Çörçillin “Uzağa” pyesinin qısa fraqmentinin teatrallaşdırılmış  oxunuşu baş tutub.

Kəril Çörçillin distopik dram kimi yazılmış pyesi həm də eksperimental əsər  kimi səciyyələndirilir. Pyes Harper, Coan və Toddun başına gələn, 3 müstəqil hissədən ibarətdir. Çörçillin bu pyesinin əsas mövzusu qorxu və ictimai xaosdur.

Oxunuşu  Azərbaycan Respublikasının Əməkdar artisti, DOM müstəqil teatrının aktrisası, ADMİU-nun Dram teatrı və kino aktyoru kafedrasının dosenti Yaqut Paşazadənin rəhbəri olduğu  IV kurs tələbələri Nərmin Quliyeva, Fidan Ağazadə, Ləman Səlimova, Abbas Qənbərov, Zeynəb Əliyeva, Könül Nəzərova, Elşad Şirinov həyata keçiriblər. Daha sonra pyes oxunuşunun müzakirəsinə başlanılıb. Maraqlı diskussiya şəraitində baş tutan  müzakirədən sonra Teatrşünaslıq kafedrasının dosenti Elçin Cəfərov iştirak edən hər kəsə təşəkkürünü bildirib və ikinci  günün proqramını yekunlaşdırıb.