23 fevral tarixində “KATALİZATOR ArtHub” tərəfindən təşkil edilən “Böyük Britaniyanın çağdaş dramaturgiyası: TANIMA” layihəsinin sonuncu tədbiri keçirilib. Cümə günü baş tutan görüş iki hissədən ibarət olub. ADMİU-nun professor-müəllim heyəti, Britaniya Şurasının əməkdaşları, teatr xadimləri və media nümayəndələrinin iştirakı ilə keçirilən sonuncu görüş Azərbaycan Dövlət Mədəniyyət və İncəsənət Universitetinin Elmi Şura otağında baş tutub. Tədbirin ilk hissəsinə keçməzdən öncə layihə rəhbəri Elçin Cəfərov gələn qonaqları salamlayaraq, bu tədbirin son olmayacağını, buna bənzər layihələrin davam edəcəyini bildirib. E.Cəfərov layihənin gerçəkləşməsinə dəstək olan Britaniya Şurasına, Azərbaycan Dövlət Mədəniyyət və İncəsənət Universitetinin rəhbərliyinə, professor-müəllim heyətinə və tələbələrə, o cümlədən layihənin tərəfdaşları olan Teatro.az sənət portalına, YUĞ Dövlət Teatrına, Ritual Mobil Teatr laboratoriyasına və CHARACTERS Dramaturgiya Festivalına təşəkkürünü çatdırıb. Sonra Britaniya Şurasının Azərbaycan üzrə direktoru Nərgiz Hacıyeva tribunaya dəvət edilib. “Biz Britaniya və Azərbaycan arasında mədəniyyət və incəsənət sahəsində yaranan təşəbbüsləri həmişə dəstəkləməyə hazırıq”- deyə çıxışına başlayan natiq bu üç tədbirin teatrın inkişafı baxımından faydalı olduğundan bəhs edib. 

Tədbirin birinci hissəsində "Böyük Britaniyada hüdudsuz teatr/eksperimental performans" mövzusunda seminar baş tutub. Seminarın spikeri London Metropolitan Universitetinin müəllimi, prodüser və mentor Manik Qovinda olub. Spiker Böyük Britaniyanın çağdaş teatr prosesinə ekskurs edib, öz şəxsi təcrübəsinə söykənərək, Britaniya teatrında müşahidə olunan yeni tendensiyalar, eksperimental teatr formaları və eksperimental tamaşalar haqqında danışıb. 

Seminardan sonra Universitetin kiçik səhnəsində “Britaniya dramaturgiyasında ənənəvi konsept” adlı müzakirə keçirilib. Tədbirin bu hissəsi Teatrşünaslıq kafedrasının müəllimi Emin Əliyevin mövzu haqqında çıxışı və moderatorluğu ilə keçib. Gedişatda Fibi Uoller-Bricin “Flibəq” pyesinin qısa fraqmentinin oxunuşu baş tutub. Oxunuşu Azərbaycan Respublikasının Əməkdar artisti, DOM müstəqil teatrının aktrisası, ADMİU-nun Dram teatrı və kino aktyoru kafedrasının dosenti Yaqut Paşazadənin rəhbəri olduğu  IV kurs tələbələri  Fidan Ağazadə, Ləman Səlimova, Nərmin Quliyeva, Abbas Qənbərov, Zeynəb Əliyeva, Könül Nəzərova, Nicat İsgəndərli, Aydan Məhərrəmova, Elşad Şirinov həyata keçiriblər. Daha sonra layihə iştirakçıları, könüllülər və tələbə-aktyorlar Nərgiz Hacıyeva və Elçin Cəfərov tərəfindən sertifikatlarla təltif olunub. Tədbirin davamında pyes oxunuşunun müzakirəsi keçirilib. Sonda Teatrşünaslıq kafedrasının dosenti Elçin Cəfərov layihənin nəticələri haqqında danışaraq bu cür layihələrin hər kəsi teatr barəsində düşünməyə çağırıdığını bildirib və tədbirlərə qatılan bütün iştrakçılara təşəkkürünü çatdıraraq üçüncü günün proqramını və bağlanış mərasimini yekunlaşdırıb.