Sofiya Opera və Balet Teatrında Azərbaycan Respublikasının Müstəqillik Günü və Azərbaycanla Baolqarıstan arasında diplomatik münasibətlərin qurulmasının 30 illiyi münasibətilə bəstəkar Fikrət Əmirovun “Min bir gecə” baleti oynanılıb.

Tamaşada, Azərbaycan Respublikası xarici işlər naziri Ceyhun Bayramov və Bolqarıstan Respublikası xarici işlər naziri Teodora Gençovska, Beynəlxalq Türk Mədəniyyəti və İrsi Fondunun prezidenti Günay Əfəndiyeva, Bolqarıstan rəsmiləri, bu ölkədəki diplomatik korpusun nümayəndələri, çoxsaylı izləyicilər iştirak edib.

Açılış zamanı Ceyhun Bayramov bildirib ki, Müsəlman Şərqinin ilk demokratik respublikası, 1918-ci ildə qurulan Azərbaycan Demokratik Respublikasıdır.

"1991-ci ildə ölkəmizin müstəqilliyini bərpa edilib və ölkəmiz böyük inkişaf yolu keçib. Azərbaycan multikulturalizm ənənələrinə hər zaman sadiqdir və bu gün nümayiş etdirilən baleti, yəni Azərbaycan və Bolqarıstan sənətçilərinin birgə layihəsini, multikulturalizm nümunəsi saymaq olar." - Bayramov qeyd edib.

Nazir T.Gençovska isə, Azərbaycanın Müstəqillik Gününü və diplomatik münasibətlərin qurulmasının 30 illiyi münasibətilə təbrik edib və oynanılan premyera tamaşasının, mədəniyyət sahəsində ikitərəfli münasibətlərin inkişafına töhfə verdiyini bildirib.

Beynəlxalq Türk Mədəniyyəti və İrsi Fondunun prezidenti Günay Əfəndiyeva, Fikrət Əmirovun yalnız Azərbaycanın deyil, bütün türk dünyasının dahi bəstəkarı olduğunu qeyd edib və sözügedən balet tamaşasının həm də türk mədəniyyətinin təşviq edilməsi baxımından əhəmiyyətli olduğunu vurğulayıb.

Tamaşa, Dirijor Eyyub Quliyevin idarəsi ilə, Eldar Əliyevin xoreoqrafiyası əsasında oynanılıb.