Azərbaycan Dövlət Akademik Opera və Balet Teatrında bəstəkar Lalə Cəfərovanın “Bir Xəzər əfsanəsi” adlı balet tamaşasının premyerası olacaq. Teatrın mətbuat xidmətindən aldığımız məlumata görə, premyera yanvar ayının 30-u saat 19:00-da baş tutacaq.

Tamaşanın bəstəkarı L.Cəfərova Azərbaycan Bəstəkarlar İttifaqının üzvü, Bakı Musiqi Akademiyasının dosenti, sənətşünaslıq üzrə fəlsəfə doktoru, respublikanın Əməkdar müəllimidir. Bir simfoniya, fortepiano və simfonik orkestr üçün iki konsert, simfonik süitalar, kamera, instrumental və caz əsərlərinin, mahnı və marşların müəllifi olan bəstəkar, eyni zamanda bədii-sənədli filmlərə musiqi bəstələmiş, tələbələr üçün beş dərslik yazmışdır. Onun əsərləri Azərbaycan Dövlət Filarmoniyasında simfonik orkestr və xor kapellasının ifasında dəfələrlə səslənmişdir. “Bir Xəzər əfsanəsi” adlı balet tamaşasının libretto müəllifi L.Cəfərova, quruluşçu baletmeysteri Azərbaycanın Xalq artisti Kamilla Hüseynova, quruluşçu rəssamı Əməkdar mədəniyyət işçisi Tehran Babayev, dirijoru Antal Dorati adına beynəlxalq müsabiqənin laureatı Orxan Həşimovdur.

Əsas rolları balet truppasının aparıcı solistləri - Əməkdar artistlər Anar Mikayılov, Makar Ferştandt, gənc solistlər Ayan Eyvazova, Seymur Qədiyev və İslam Məmmədov ifa edirlər.