3 iyul 2024-cü il tarixində Çilinin Azərbaycandakı səfirliyi və CHARACTERS Müasir Dramaturgiya Festivalının təşkilatçılığı ilə Çili dramaturqu və rejissoru Pablo Manzinin “Barbarların yaşadığı yer” (“Donde Viven los Bárbaros”) pyesinin oxunuşu həyata keçirilib.

“Kapellhaus” Alman-Azərbaycan Mədəniyyət Mərkəzində baş tutan oxunuş CHARACTERS Müasir Dramaturgiya Festivalının Azərbaycanda müasir dramaturgiyanın populyarlaşdırılması və inkişafına yönəlmiş növbəti tədbiri oldu.

Pablo Manzinin 2015-ci ildə yazdığı pyesi Azərbaycan dilində təqdim olunmuşdu. Pyesinin ispan dilindən tərcüməsini İlahə Əkbər həyata keçirib, mətnin redaktoru şair və tərcüməçi Qismət Rüstəmovdur. Oxunuşun quruluş müəllifi Azərbaycan Dövlət Akademik Rus Dram Teatrının və Azərbaycan Dövlət YUĞ Teatrının rejissoru Tural Mustafayevdir. Oxunuşda Azərbaycan Dövlət Mədəniyyət və İncəsənət Universitetinin tələbələri iştirak etdilər: Fəxri Səfərov, İlahə Şahverənli, Nihad Aslan, Fərid İsmayılov və Nicat İsgəndərli.

“Barbarların yaşadığı yer” pyesi müasir dünyada zorakılıq və qorxu mövzusunu, cəmiyyət daxilindəki sosial-siyasi fikir ayrılıqlarını gündəmə gətirir, miqrantların problemlərinə və gender kimliyinə toxunur. Oxunuşdan sonra yaradıcı heyətinin və tamaşaçıların iştirakı ilə müzakirə aparılıb. Müzakirədə teatrşünas və tənqidçi Aydın Talıbzadə, teatrşünas Vidadi Qafarov, YUĞ Teatrının baş rejissoru Mikayıl Mikayılov, CHARACTERS Festivalının kuratoru, dramaturq İsmayıl İman və Çilinin Azərbaycandakı diplomatik missiyasının rəhbəri Ciankarlo Alberti iştirak etdilər.