25 dekabr 2023-cü il tarixində Azərbaycan Respublikasının Mədəniyyət Nazirliyi, Teatr Xadimləri İttifaqı və Dövlət Teatr Muzeyinin təşkilatçılığı ilə  Azərbaycan milli professional teatrının 150 illik yubileyinə həsr olunmuş «AZƏRBAYCAN TEATRI – 150 - ÜÇ ƏSRDƏN KEÇƏN TEATR» mövzusunda elmi-praktik konfrans keçirilib.

Teatr Xadimləri İttifaqının Mustafa Mərdanov səhnəsində keçirilən konfransda görkəmli teatrşünas-alimlər, sənət adamları və media nümayəndələri iştirak ediblər. İştirakçılar foyedə təşkil olunmuş sərgi ilə tanış olublar.

Konfransda Azərbaycan teatrının keçdiyi tarixi yoldan bəhs edilib, mövcud problemlər və perspektivlər müzakirə olunub, təkliflər səsləndirilib.

Tədbirdə Əməkdar incəsənət xadimi, professor İlham Rəhimlinin “Azərbaycan teatrı-150 - üç əsrdən keçən teatr”, Əməkdar incəsənət xadimi, professor Məryəm Əlizadənin “Azərbaycan teatrı: uzaq proqnoz”, Əməkdar incəsənət xadimi, professor Əli Əmirlinin “Yeni dram, yeni dramaturgiya”, Əməkdar incəsənət xadimi, professor Aydın Talıbzadənin “Azərbaycan teatrı: külək və su”, sənətşünaslıq üzrə fəlsəfə doktoru, dosent Vidadi Qafarovun “Azərbaycan teatrının sosioloji mənzərəsi: problemlər, perspektivlər” və sənətşünaslıq üzrə fəlsəfə doktoru, dosent Elçin Cəfərovun “Köhnə teatr və təzə bazar: menecment və marketinq strategiyası” mövzularında məruzələri dinlənilib.

Çıxışlararası teatrın 150 illik tarixini əks etdirən videoçarx göstərilib.
 

Aida Qafarova
       Azərbaycan TXİ-nin məsul katibi