Azərbaycan Respublikasının əməkdar rəssamı, Azərbaycan Rəssamlar İttifaqının, Teatr Xadimləri İttifaqının və Rusiya Rəssamlar İttifaqının üzvü, uzun illər Şəki Dövlət Dram Teatrında baş rəssam işləmiş Qüdrət Məmmədov 20 fevral 2021-ci ildə ömrünün 85-ci ilində vəfat edib.
Qüdrət Hacıbəy oğlu Məmmədov 1936-cı ildə Şəki şəhərində anadan olub. İlk təhsilini burada alan Q.Məmmədov, 1957-ci ildə Əzim Əzimzadə adına Bakı Rəssamlıq Məktəbini fərqlənmə diplomu ilə bitirib.
1964-cü ildə Xarkov Dövlət Rəssamlıq İnstitutunda ali təhsilini başa vurub və H.Zərdabi adına Gəncə Dövlət Pedaqoji İnstitutunda müəllim kimi fəaliyyət göstərib. 1965-ci ildən 1970-ci ilədək Gəncə şəhərinin baş rəssamı olub. 1970-ci ildən 1973-cü ilədək Gəncə Rəssamlıq məktəbində müəllim kimi fəaliyyət göstərib.
1975-ci ildən Şəki Dövlət Dram Teatrında baş rəssam kimi fəaliyyətə başlayan Q. Məmmədov təqaüdə çıxanadək bu vəzifədə çalışıb. İşlədiyi bu uzun illər ərzində 140-dan artıq tamaşaya səhnə tərtibatı verib.
SSRİ-də keçirilən bolqar, macar, alman, rumın, çex dramaturgiyası festivallarında iştiraik etmiş, Stoyanovun “Ustalar”, Ş.Petefinin “Pələng və kaftar”, B.Brextin “Arturi Uİ-nin karyerası”əsərlərinə verdiyi tərtibata görə yüksək dərəcəli diplomlara layiq görülüb.
Bunlardan başqa, Azərbaycan və dünya klassiklərinin dram əsərlərinə orjinal tərtibatlar verib. Bunlara nümunə olaraq M.F.Axundovun “Vəziri Xani Lənkəran”, “Müsyö Jordan və Dərviş Məstəli Şah”, “Hacı Qara”, V.Şeksprin “Kral Lir”, “Romeo və Cülyetta”, “Yay gecəsinin yuxuları”, C.M.Quluzadənin “Dəli yığıncağı”, H.Cavidin “İblis”,”Knyaz”, Ç.Aytmatovun “Əsrə bərabər gün”, K.Çapekin “Ağ xəstəlik”, N.Hikmətin “Bayramın birinci günü” və s. kimi əsərləri göstərmək olar.
Qüdrət Məmmədov obrazlı düşüncə qabiliyyətinə malik rəssam idi. Tərtibatlarında rejissor ideyasının, tamaşanın ali məqsədinin estetik səciyyələri özünün ifadəli təcəssümünü tapırdı. Səhnədə məkan və zaman xronotopunun əsas prinsiplərini həssaslıqla gözləyirdi. Rəssam səhnəqrafiyanın klassik milli ənənələri ilə avanqard teatr estetikasını həssaslıqla qovuşdura bilirdi.
Tanınmış rəssam, mədəniyyət xadimi və səmimi insan Qüdrət Hacıbəy oğlu Məmmədovun əziz xatirəsi teatrsevərlərin qəlbində daim yaşayacaqdır.
Allah rəhmət eləsin!
