Teatr rejissoru, Azərbaycanda ilk interaktiv dOM teatrının yaradıcısı, Azərbaycan Dövlət Mədəniyyət və İncəsənət Universitetinin Mədəniyyət Mərkəzinin direktoru Tərlan Rəsulov Azərbaycanı Budapeştdə keçirilən 10-cu MITEM Beynəlxalq teatr festivalında təmsil edəcək.

Qeyd edək ki, bu ilin aprel ayında Tərlan Rəsulov ölkəmizi Macarıstanda Beynəlxalq Teatr Olimpiadasında təmsil edən yeganə rejissor olub.

T.Rəsulov olimpiadada  50 ölkədən 750-dən artıq tamaşanın yalnız Budapeştdə deyil, həmçinin Macarıstanın digər şəhərlərində də nümayiş olunduğunu bildirib. Qeyd edib ki, olimpiada dörd ildə bir dəfə keçirilir.

Onun sözlərinə görə, Azərbaycanın da belə tədbirə ev sahibi olması arzuolunandır. Teatrın təcrid olma vəziyyətini aradan götürmək lazımdır. Azərbaycan teatrının bütün güclü tərəflərini digər ölkələrin teatr xadimləri və tamaşaçılarına təqdim etmək üçün bizdə hər bir – insan, maliyyə resursları, təşkilati imkanlar mövcuddur.

Teatr Olimpiadasının son akkordu kimi MITEM festivalı olacaq. Bu tədbirin zəngin proqramına teatr konfransı, disputlar və dəyirmi masa müzakirələri daxil edilib. Bundan başqa Fransa, Almaniya, Çexiya, Slovakiya, Gürcüstan və digər ölkələrdən əlamətdar tamaşaların, o cümlədən, Macarıstan milli teatrının nümayişi nəzərdə tutulub. 2014-cü ildə əsası qoyulmuş festivalın məqsədi Macarıstanı dünya teatr xəritəsinə daxil etmək və onu peşəkarları və teatrsevərləri özünə cəlb edən bir məkana çevirməkdir. Son illər ərzində festival çərçivəsində 30 ölkədən 200-dən artıq tamaşaya baxa biliblər. Teatr rejissoru və festivalın təsisçisi Attila Vinyanskinin sözlərinə görə, festivalın ən vacib məqsədi siyasətin məhv etdiyi mədəni körpülərin bərpasıdır. Onun dediyi kimi: “Biz öz milli teatr ənənəsini tapmaq və yeniləndirmək niyyətinə xidmət edən tamaşa və yaradıcı insanları axtarırıq”.

Mənbə: AZƏRTAC