Azərbaycan İncəsənət Məktəbində hər həftənin bazar günü tanınmış sənət adamları ilə görüşlər, ustad dəsrləri və təlimlər keçirilir. Bu vaxta qədər AİM-də Mingəçevir Dövlət Dram Teatrının baş rejissoru, prezident mükafatçısı Vüsal Mehrəliyevin “Vaxtanqov məktəbin əsasında aktyor və rejissor sənətinin prinsipləri” ustad dərsi, Teatr Xadimləri İttifaqının gənclər sektorunun müdiri Dağlar Yusifin “Müasir incəsənətdə aktyor sənətinin yeni formasiyaları”, Şukin adına Teatr İnstitutunun məzunu, Azərbaycan Dövlət Akademik Rus Dram Teatrının aktyoru Abdulla Elşadlının “Aktyor sənətinin biznes həyatınızdakı rolu”, Lənkəran Dövlət Dram Teatrının baş rejissoru Anar Babalının “Teatr rejissorluğunda müşahidənin rolu və önəmi”, Azərbaycan İncəsənət Məktəbinin təsisçisi və müəllimi Fərid Bağırovun "Aktyor sənəti və səhnə danışığı ixtisasları barədə" təlimləri və şair, yazıçı, kinodramaturq İlqar Fəhmi ilə görüş keçirilib. Azərbaycan İncəsənət Məktəbinin direktoru Tural Əliyevin məlumatına görə, bu layihələr gələcəkdə də davam etdiriləcək. Növbəti istirahət günündə AİM-də Azərbaycan Respublikasının Xalq artisti, "Şöhrət" ordeni laureatı Nurəddin Mehdixanlı ilə görüş keçiriləcək. 4 sentyabr tarixində saat 15:00-da. Azərbaycan İncəsənət Məktəbində baş tutacaq görüşdə söhbət əsasən, aktyorun obraz üzərində iş prosesi mövzusu üzərində qurulacaq. 
Tamaşaçılar həmişə səhnədən oyununu izlədikləri Nurəddin Mehdixanlını bu dəfə canlı görüb, onun sənət və teatr haqqında düşüncələri, səhnə təcrübəsi ilə yaxından tanış ola biləcəklər. 
Görüşə qatılan iştirakçılara sertifikat verilir. Tədbirlərə giriş ödənişsizdir.