Cəfər Cabbarlı adına Azərbaycan Dövlət Teatr Muzeyinin yaradılmasının 90 illik yubileyinə həsr olunmuş tədbir keçirilib.

Tədbiri muzeyin direktoru, Əməkdar mədəniyyət işçisi Sevinc Mikayılova giriş sözü ilə açaraq öncə Azərbaycan milli peşəkar teatrının tarixi haqqında qısa məlumat verib. Ardınca bu tarixi özündə ehtiva edən, profilinə görə Yaxın Şərqdə yeganə olan Teatr Muzeyinin keçdiyi inkişaf yolundan, bugünkü fəaliyyətindən, habelə gələcək planlarından geniş söhbət açıb. Rəhbərlik etdiyi qurumun mədəniyyət ocağı olması ilə bərabər, elmi-tədqiqat sahəsinə də töhfələr verən unikal bir müəssisə olduğunu vurğulayıb.

Daha sonra qonaqlara muzeyin fondunda qorunan və muzey əməkdaşları tərəfindən hazırlanmış eksponatlardan ibarət videoçarx nümayiş olunub.

Azərbaycan Mədəniyyət İşçiləri Həmkarlar İttifaqının Respublika Komitəsinin kütləvi işlər üzrə müdiri Əfsanə Güləhmədova tədbir təşkilatçılarını, hər kəsi salamlayaraq, milli-mənəvi irsimizin qorunub saxlanılması, cəmiyyətə təqdim olunması və layiqincə təbliğini təmin etdiklərinə görə muzeyin direktoru başda olmaqla bütün muzey əməkdaşlarını təbrik edib, onlara gələcək işlərində uğurlar arzulayıb və muzeyin rəhbər heyətinə Fəxri Fərmanlar təqdim edib.

Tədbirdə Azərbaycan Teatr Xadimləri İttifaqının sədri, Xalq artisti Hacı İsmayılov, Əməkdar incəsənət xadimləri, professor və sənətşünaslıq doktorları Məryəm Əlizadə, İlham Rəhimli, Xalq artisti, rejissor Mərahim Fərzəlibəyov, Azərbaycan Dövlət Akademik Milli Dram Teatrının bədii rəhbəri, Əməkdar incəsənət xadimi Mehriban Ələkbərzadə, Xalq artisti Nurəddin Mehdixanlı, Muzey Sərvətləri və Xatirə Əşyalarının Elmi Bərpa Mərkəzinin direktoru, Əməkdar mədəniyyət işçisi Zərifə Məlikova, C.Cabbarının ev muzeyinin direktoru, Əməkdar mədəniyyət işçisi  Qəmər Seyfəddin qızı, Azərbaycan Musiqi Mədəniyyəti Dövlət Muzeyinin drektoru, Əməkdar mədəniyyət işçisi Alla Bayramova, Azərbaycan Milli Elmlər Akademiyasının əməkdası, filologiya üzrə fəlsəfə doktoru Nəzakət Qafqazlı  öz çıxışlarında muzeyin ictimaiyyət  arasındakı  nüfuzunu vurğulayaraq bütün muzey əməkdaşlarını yubiley münasibətilə ürəkdən təbrik ediblər.

Tədbir çərçivəsində Azərbaycan Dövlət Akademik Opera və Balet Teatrının və Azərbaycan Dövlət Akademik Musiqili Teatrının aktyorlarının ifasında musiqi nömrələri təqdim olunub.

Tədbirdə Azərbaycan Respublikası Mədəiyyət Nazirinin müavini Murad Hüseynov və nazirliyin əməkdaşları, elm və incəsənət xadimləri, muzey rəhbərləri, muzey əməkdaşları və media nümayəndələri iştirak ediblər.

Sonda xatirə şəkilləri çəkilib.