TEATRO

TEATRO

sənət portalı

post-title

Ayağa durun, "Müqəssir" gəlir..!

Lənkəran Dövlət Dram Teatrında Əbdürrəhim bəy Haqverdiyevin "Kimdir müqəssir?" vodevilinin motivi əsasında "Müqəssir" tamaşasının məşqləri davam etdirilir. Mistik komediya janrında olan səhnə əsərinin müəllifi B.Şukin adına Moskva Teatr İnstitutunun məzunu, Azərbaycan Akademik Rus Dram Teatrının aktyoru Abdulla Elşadlıdır.

Qeyd edək, ki, tamaşada rejissor müəllif kimi çıxış edib və Əbdürrəhim bəy Haqverdiyevin pyesində Mixail Bulqakovun "Master və Marqarita" əsəri ilə uzlaşmalar və eynilikləri aşkarlamaqla əsərə intertekstuallıq gətirib.

 

Tamaşada Allah tərəfindən yollanılan Elçinin yanında Ə.Haqverdiyevin orijinal tekstində qeyd olunan Qasım bəyin evinin döşəməsindəki xalçanın üstündə toxunmuş pişik də gəlir (Pişik Begemot). Burada Elçi həm Voland (İblis, Mefistofel) və həm də Mələyin vəzifəsini özündə cəmləyir.

 

Ümumi hadisələr isə kinostudiyanın montaj otağında gecənin yarısında cərəyan edir. Səhnələr sanki Cut montaj üslubunda bir-birlərinə Tanrı tərəfindən (Ən böyük rejissor və montajçı) birləşdirilir.

 

Tamaşanın quruluşçu rəssamı Tərlan Sadıqov, musiqi tərtibatçısıı Azər Hacıəsgərlidir.
 

Elçi rolunu Azərbaycan Respublikasının Xalq artisti Qabil Quliyev, Qadın obrazını aktrisalardan Gülər Kərimova və Ayşən Əsədova, Kişi obrazını Saleh Əzimzadə, Pişik Begemotu rolunu Nizami Qurbanov canlandırırlar.

 

Rejissorun açıqlamasına görə, tamaşanın premyerası iyun ayının axırları üçün nəzərdə tutulub.

Ağaddin BABAYEV

Load Time (S) : 0.005665