12 May tarixində Avropa Azərbaycan Məktəbinin səhnəsində Evripidin yazdığı antik yunan faciəsi “Medeya” oynanılıb. Tamaşa 9-cu sinif şagirdləri tərəfindən ingiliscə ifa edilib. Əsas rollarda Amina Hacıyev (Medeya), İlkin Bayramov (Yason), Ramiz Əhmədzadə (Kreont), Fuad Tağıyev (Egey), Fainə Cəfərova, Nuray Həsənova, Nərgiz Quliyeva (dayələr), Bəxtiyar Sadıqov (tyutor), Ayan Əliyeva (carçı), Əminə İsmayılova və Riyad İsmayılov (xor rəhbərləri), Ellada Cəfərzadə və Nərgiz Əliyeva (uşaqlar) olub. Kütləvi səhnələrdə digər şagirdlər xoru təşkil ediblər. 

Rejissor, məktəbin dram müəlliməsi Sara Karimli tərəfindən hazırlanan tamaşada yalnız dəvətli qonaqlar və valideynlər tamaşaçı qismində iştirak edə bilib.

Tamaşadan sonra məktəbin direktoru Françesko Bankini bu teatral proyektin şagirdlərin özünü səhnədə ifa etməsində və birlikdə əmakdaşlıq etmək üçün gözəl fürsət olduğunu qeyd edib. Ardınca direktor bütün şagirdləri və rejissor-müəlliməni təbrik edərək zəhmətlərini qeyd edib.

Qeyd edək ki, Medeya məktəbin səhnəsində oynanılan ikinci yunan faciəsidir. Keçən il eyni rejissor-müəllimə tərəfindən Sofoklun “Antiqona” faciəsi 10-cu sinif şagirdləri tərəfindən ifa edilmişdi.