Qara dənizin Efesi adı ilə məhşur olan Prusias Ad Hypiumda 2 min il sonra  ilk dəfə teatr tamaşası oynanılıb. Tamaşa eramızdan əvvəl 3-cü yüzilliyə aid Prusias Ad Hypiumda uzun müddətdir aparılan arxeoloji qazıntılardan sonra baş tutub. Aristofanın (təqribən e.ə. 446-386) “Quşlar” komediyasını tamaşaya qoyan rejissor Süleyman İnceefe  “2 min il sonra ilk dəfə buranın  ruhuna uyğun tamaşa oynanılır, çox həyəcanvericidir” deyib.

2 min il sonra qapılarını sənətsevərlərin üzünə açan Prusias Ad Hypium antik şəhər teatrı Düzcənin Konuralp bölgəsində yerləşir. Bu, antik abu-havası olan ilk tamaşa olduğu üçün seyrçilər tərəfindən rəğbətlə qarşılanıb.

Tamaşa haqqında rejissor Süleyman İnceefe deyib ki, “Burada davam edən arxeoloji qazıntılar artıq bitmək üzrədir. Açılışı da buranın ruhuna uyğun olması üçün Aristofanın “Quşlar“ komediyası ilə etdik. Bu tamaşa Düzcə Universitetinin İncəsənət Dizaynı Memarlıq fakültəsinin Səhnə Sənətləri ixtisasında təhsil alan tələbələri tərəfindən hazırlanıb. Mən də müəllimləri olaraq əlimdən gələn köməyi etdim. Birlikdə bu həyəcanverici gecəni bölüşürük”. O, sözlərinə  “teatr təqribən 2 min il sonra öz ruhuna uyğun şəkildə tamaşaçı qarşısına çıxır. Bu bizi həm çox sevindirir, həm də həyəcanlandırır. Tamaşaçılar sanki pandemiya dövründə bu tipli şeylərə susamışdı. Sağ olsun, gəldilər”, ifadələrini də əlavə edib .

Antik teatrda oynanılan Aristofanın “Quşlar” komediyası tamaşaçıları qəhqəhəyə qərq edib. Tamaşa seyirçilər tərəfindən uzun müddət alqışlanıb. Düzcə Bələdiyyə sədri Faruk Özlü ilə universitetin rektoru, professor Nigar Demircan Çakar da tamaşanı izləyənlər arasında olub.