ADMİU-da tələbə-teatrşünasların növbəti elmi konfransı keçirilib

Martın 12-də Azərbaycan Dövlət Mədəniyyət və İncəsənət Universitetində (ADMİU) “Arto epoxasının teatrı” mövzusunda tələbə elmi konfransı keçirilib.

Hər il ənənəvi olaraq Teatr sənəti fakültəsinin Teatrşünaslıq kafedrası tərəfindən təşkil edilən konfrans bu il XX əsr avanqard sənətin ideoloqlarından olan Antonen Artoya və ondan təsirlənmələrə həsr olunub.

“Biz artıq Arto epoxasına daxil olmuşuq”, bunu reformator rejissor Yeji Qrotovski rejissor, teatr nəzəriyyəçisi, şair, aktyor, “qəddar teatr” konsepsiyasınıın müəllifi Antonen Arto haqqında yazdığı “O, tamamən özü deyildi” adlı məqaləsində yazırdı.

Konfransın konseptində bu sitatın olması heç də təsadüfi deyil. Teatrın ən böyük ideoloqlarından sayılan Artonun antiteatr pafosu bu gün də bizi tərk etmir. Hətta daha amansız və kəskindi”, - konfransın proqramında qeyd olunur.

Universitet rəhbərliyi, professor-müəllim heyəti, tələbələrin iştirak etdiyi konfransda giriş sözu ilə ADMİU-nun elmi işlər üzrə prorektoru, kulturologiya üzrə fəlsəfə doktoru, dosent Sədaqət Əliyeva çıxış edərək Teatrşünaslıq kafedrasının bu təşəbbüsünün təhsilin keyfiyyətində dinamika yaratdığını söyləyib. Həmçinin, bundan əvvəl universitetdə gerçəkləşən “KATALİZATOR ArtHub” “Böyük Britaniyanın çağdaş dramaturgiyası: TANIMA” Layihəsini xatırladaraq, belə tədbirlərin vacibliyini  vurğulayıb.

ADMİU-nun tədris işləri uzrə prorektoru, filologiya üzrə fəlsəfə doktoru, dosent Nigar Rüstəmova çıxışında konfransın konseptinə diqqət çəkərək, XX əsr incəsənətinin səciyyəvi xüsusiyyətlərindən danışıb, proqramdakı mövzuların əhəmiyyətli məqamlara toxunduğunu bildirib: “Artonun yaradıcılığı, düşüncələri ətrafında elə böyük bir ideya, məna çənbəri yaradıb ki, bu çənbər sonrakı zamanların teatrlarnı və teatr adamlarını çəkib, onlara təsir edib. Konfransın belə əhatəli mövzunu seçməsi böyük gözlənti yaradır”.

Sənətşünaslıq doktoru, professor Məryəm Əlizadə isə tələbə-teatrşünasların konfransa ildən ilə daha böyük maraqla qatıldıqlarını qeyd edib: “Bu peşənin çətinliyini, dərinliyini tələbələr yəqin ki, zamanla anlayacaqlar və bu kimi konfranslar onlara böyük bir təkandır. Bizim təhsil aldığımız illərdə də belə konfranslar keçirilirdi və biz oradakı məruzələrimizi o zamankı qəzet və jurnallarda çap etdirirdik. Buna bizim ilk addımlarımız demək olardı. Mən konfransda iştirak edən tələbələrə bu ilk addımlarında uğurlar arzulayıram”.

ADMİU-nun Teatrşünaslıq kafedrasının dosenti Elçin Cəfərov konfransın tələbələrin elmi dünyagörüşünün artmasında vacibliyini xatırladıb və bəzi tələbələrin artıq bir neçə dəfə konfransda məruzəçi olduğunu diqqətə çatdırıb. “Biz bu tələbələrin  çıxışlarının necə cilalandığını, peşəkarlıq səviyyəsinin yüksəldiyini görə bilirik” – deyə o, əlavə edib.

Daha sonra tələbə-teatrşünasların məruzələri dinlənilib.

Teatr sənəti fakultəsi, teatrşünaslıq ixtisasının III kurs tələbəsi Gülnar Nağdıyeva “Qəddar dövrün qəddarlıq teatrı”, Nailə Qasımova (IV kurs) “Qanlı pərdə: XX əsr teatrı zorakılığın kölgəsində”, Nuray Abdullayeva (III kurs) “Teatr terapiya kimi: katarsis”, İlkin Tağızadə (III kurs) “Tadeuş Kantorun ölüm və yaddaş teatrı postdramatik teatrın ilk təzahürü kimi”, Aytən Abdullayeva (II kurs) “Dramaturgiyada “yuxu effekti”nin yaradılması ənənəsi”, Ramilə Abdullazadə (II kurs) “Jan Kokto və Orfey haqqında mifin sürrealist yozumu”, Əhməd Mehdiyev (III kurs) “İnformasiya dövrünün tamaşaçı fenomeni”, Fatimə Qurbanzadə (IV kurs) “Mifik qəhrəmanın dramaturgiya kontekstində transformasiya problemi” və Qönçə Firudinli (II kurs) “Heçliyin vəhşətli rəqsi: Butou” məruzələri ilə çıxış ediblər.

Konfrans məruzələrin müzakirəsi ilə yekunlaşıb.