Azərbaycan Dövlət Mədəniyyət və İncəsənət Universitetinin Teatrşünaslıq kafedrası Azərbaycanın görkəmli aktrisası Mərziyyə Davudovanın 120 illik yubileyi münasibəti ilə Elmi sessiya keçirəcək. Elmi sessiyada tanınmış teatrşünas, professor İlham Rəhimlinin aktrisanın həyat və yaradıcılığı haqqında məruzəsi dinlənəcək, Turan xanım Cavidin Mərziyyə Davudova haqqında hələ tələbəlik illərində yazdığı diplom işi əsasında cavidşünas-alim Azər Turanın nəşr etdirdiyi kitabın təqdimatı keçiriləcək. Tədbirdə həmçinin, teatr xadimlərinin, sənət adamlarının çıxışları da nəzərdə tutulub. 
Tədbir Microsoft Teams platformasında onlayn formatda 2021-ci il noyabr ayının 18-də saat 10.30-da başlayacaq.
Xatırladaq ki, Mərziyyə Davudova (1901-1962) 60 illik ömrünün 41 ilini Azərbaycan teatrına həsr edib, səhnəmizin ən aparıcı aktrisalarından biri kimi yaratdığı bənzərsiz obrazlarla milli aktyor sənətinin inkişafında müstəsna rol oynayıb. Aktrisa teatr sənəti qarşısında göstərdiyi xidmətlərə görə SSRİ Xalq artisti fəxri adına, SSRİ Dövlət mükafatına layiq görülub. Mərziyyə Davudova eyni zamanda, ictimai xadim kimi də milli mədəniyyətimiz üçün az iş görməyib, 1956-1961-ci illərdə Azərbaycan Teatr Cəmiyyətinin sədri vəzifəsində işləyib, Azərbaycan Ali Sovetinin deputatı olub.