Azərbaycan Dövlət Mədəniyyət və İncəsənət Universitetində (ADMİU) “İncəsənətdə postmodernizm dövrü və sonrası” mövzusunda tələbə elmi konfransı keçiriləcək.
Teatr sənəti fakültəsinin Teatrşünaslıq kafedrası tərəfindən hər il ənənəvi olaraq keçirilən konfransda yalnız tələbə-teatrşünaslar deyil, universitetin, həmçinin digər ali təhsil müəssisələrinin bakalavr və magistr tələbələri iştirak edə bilər. Konfransın mövzusunun “İncəsənətdə postmodernizm dövrü və sonrası” kimi seçilməsi də bununla əlaqədardır.
Postmodernizmi, yəqin ki, indiyədək mövcud olmuş ən mürəkkəb bədii təmayül adlandıra bilərik. Bu gün də onun mahiyyəti, funksiyası, meyarları, elmi-nəzəri əsasları, fəlsəfi-estetik xüsusiyyətləri və s. ilə bağlı mübahisələr səngimir. Bir çoxları postmodernizm dövrünün başa çatdığı hökmünü versələr də, digərləri onun hələ də davam etdiyi qənaətindədir. Bəziləri postmodernizmin bütövlükdə mədəniyyətə pozitiv təsir göstərdiyini dilə gətirsə də, başqaları onun mənfi çalarlarından bəhs edir.
Bəs, gənclik bu barədə nə düşünür? Müasir gənclərin baxış bucağından bütövlükdə postmodernizm necə görünür, ümumən mədəniyyətdə, incəsənətin ayrı-ayrı sahələrində - teatr, kino, musiqi, təsviri sənət və dramaturgiyada özünün hansı təzahür xüsusiyyətləri ilə meydana çıxır? Cavablanmalı sual çoxdur!
Konfransın məqsədi də tələbə və magistrləri vahid elmi problem ətrafında, bu dəfə, konkret olaraq “İncəsənətdə postmodernizm dövrü və sonrası” mövzusunda düşünməyə və münasibət bildirməyə cəlb etmək, eyni zamanda, fənlərarası inteqrasiyaya çalışmaq, tələbələrdə elmi-nəzəri yaradıcılığa həvəs oyatmaq, onlara tədqiqatçılıq keyfiyyətləri aşılamaqdır.
ADMİU-nun əsas binasında, Elmi şura otağında 12 mart 2025-ci il tarixində əyani formada keçiriləcək konfrans saat 11:00-da başlayacaq.
Qeyd:
Konfransa qatılmaq istəyən tələbə və magistrlər 5 səhifədən çox olmayan məruzələrini elektron mətn şəklində (A4 ölçü vərəqi, 14 ölçü, Arial şrift, 1,5 interval) 5 mart 2025-ci il tarixinə qədər konfrans@admiu.edu.az elektron poçt ünvanına göndərə bilərlər.
Əlaqə: 050 344 70 88 Vidadi Qafarov
